Նովգորոդի քրեական աշխարհի ենթադրյալ առաջնորդ Մխիթարյանը շարունակում է կալանքի տակ մնալ Մոսկվայում

Հայաստանում ձերբակալված, Ռուսաստանի Դաշնություն էքստրադիցիայի ենթարկված և մոսկովյան «Մատրոսսկայա տիշինա» մեկուսարանում պահվող Նովգորոդի քրեական աշխարհի ենթադրյալ առաջնորդ Թելման Մխիթարյանն առաջիկայում կալանքի տակ կմնա Մոսկվայում, չորեքշաբթի ՌԻԱ Նովոստիին է հայտնել Նովգորոդի մարզային ՆԳՎ պետ, ոստիկանության գեներալ մայոր Անատոլի Յակունինը։

«Դեպի Մեծ Նովգորոդ նրան ուղղելու անհրաժեշտություն առայժմ չկա (քննչական գործողություններ իրականացնելու համար), մենք գնում ենք և կգնանք Մոսկվա»,- ասաց ՆԳՎ ղեկավարը։

Ըստ նրա, հանցավոր խմբի ենթադրյալ մյուս ղեկավարները և ակտիվ մասնակիցները՝ Նիկոլայ Կրավչենկոն, Անդրեյ Պետրովսկին, Դմիտրի Կարպովը, Վադիմ Նիկիտինը և Անդրեյ Օռլովն առաջվա պես հետախուզման մեջ են, և նրանց գտնվելու վայրի մասին լուրերի համար ՆԳՎ-ն խոշոր մրցանակներ կվճարի։

Մեծ Նովգորոդի պատվավոր քաղաքացի Մխիթարյանը «Նովգորոդի ապակեմանրաթելի գործարանի» բաժնետիրական միությունների և մի շարք այլ ձեռնարկությունների ու կազմակերպությունների ղեկավար է եղել և հետխորհրդային ժամանակներում վերահսկել է տարածաշրջանի տնտեսության զգալի մասը։

Նա զբաղեցրել է մարզի նախկին մարզպետ Միխայիլ Պրուսակի քաղաքական հարցերով խորհրդականի պաշտոնը։

Չբացահայտված հանցագործները 2005 թվականի հունիսին Մեծ Նովգորոդում ռադիոկառավարվող պայթուցիկ սարքի միջոցով մահափորձ են կատարել Մխիթարյանի նկատմամբ։

Պատահականության բերումով արդյունաբերողը չի տուժել։

Մխիթարյանը ՔՕ 163 հոդվածի երրորդ մասով (դրամաշորթություն) հարուցված գործի գլխավոր դերակատարներից մեկն է: Այս հոդվածը նախատեսում է յոթից տասնհինգ տարի ազատազրկում՝ 1 միլիոն ռուբլի տուգանքով:

Մխիթարյանը թաքնվել էր իրավապահներից և գտնվում էր դաշնային ու միջպետական հետախուզման մեջ:

Իրավապահները ձերբակալել են նրան օգոստոսի 24-ին Երևանում, ինչից հետո նա կալանքի տակ է առնվել:

Գործակալությունը չի ներկայացնում Մխիթարյանի պաշտպանի մեկնաբանությունները:-0-