ԵՐԵՎԱՆ, 7 մայիսի. /Նովոստի-Արմենիա/. ԽՍՀՄ զինվորական կորուստները Հայրենական մեծ պատերազմում կազմել են 8 միլիոն 644 հազար մարդ, հինգշաբթի լրագրողներին հայտնել է Խորհրդային միության մարշալ Դմիտրի Յազովը։
«Մեր տվյալներով՝ 27-28 միլիոն քաղաքացիական անձ է զոհվել»,- ասել է Յազովը, հաղորդում է «ՌԻԱ Նովոստին»։ Նրա խոսքերով՝ այս տվյալները ստացվել են այն հանձնաժողովի աշխատանքի արդյունքում, որը ձևավորվել էր դեռ այն ժամանակ, երբ Յազովը ԽՍՀՄ պաշտպանության նախարարն էր։
«Լինելով պաշտպանության նախարար՝ ես հրամանագիր ստորագրեցի Կարմիր բանակի և ընդհանուր առմամբ Խորհրդային միության կորուստները հաշվարկելու համար: Ռուսաստանի գիտությունների ակադեմիայի և այլ կազմակերպությունների հետ համատեղ մենք ստացանք 11 միլիոն 200 հազար թիվը»,- պատմել է Յազովը։
Հաշվարկներից հետո հաստատվել է, որ, ըստ նրա, Կամիր բանակի կարուստները Հայրենական մեծ պատերազմում կազմել են 8 միլիոն 644 հազար մարդ։ Բացի այդ, Յազովի տվյալներով, մոտ 27-28 միլիոն մարդ կազմել են քաղաքացիական բնակչության կորուստները։
«Ճամբարներում ոչնչածվածների վերաբերյալ մենք տվյալներ չունենք, քանի որ այդ տեղեկատվությունը վերացված է»,- հայտնել է Յազովը։
«Հստակ ասել, թե որքան խորհրդային մարդիկ են զոհվել Հայրենական մեծ պատերազմում, հնարավոր չէ։ Ինչպես չի կարելի ասել, թե այդ պատերազմի հետևանքով որքան մարդ չի ծնվել»,- հավելել է մարշալը։
ՌԴ պաշտպանության նախարարության Հայրենքի պաշտպանության ժամանակ զոհվածների հիշատակը հավերժացնելու հարցերի վարչության պետ, գեներալ-մայոր Ալեքսանդր Կիրիլինն ապրիլի 5-ին «ՌԻԱ Նովոստիին» հայտնել է, որ ԽՍՀՄ ժողովրդագրական կորուստները Հայրենական պատերազմի տարիներին կազմում են 26 միլիոն մարդ։ ՌԴ ուժային գերատեսչությունները Ռոսարխիվի և Ռոսստատի հետ համատեղ մտադիր են ճշտել այդ թվերը։ Կիրիլինի խոսքերով՝ Հայրենական մեծ պատերազմից հետո մինչև 1991 թվականը Կարմիր բանակի կորուստները հաշվարկվել են երեք անգամ, և էական տարբերություններ առկա տվյալների հետ չեն եղել։ -0-
