ԵՐԵՎԱՆ, 7 մայիսի. /Նովոստի-Արմենիա/. «Մեր հաղթանակը» միջազգային հեռուստամարաթոնը՝ կազմակերպված «Միր» ՄՀՌԸ կողմից, ԱՊՀ մասնակից-երկրների հումանիտար համագործակցության միջազգային հիմնադրամի սատարմամբ, մայիսի 9-ին Մոսկվան կկապի Ռուսաստանի և Համագործակցության 11 քաղաքների հետ՝ Սանկտ Պետերբուրգ, Բրեստ, Թբիլիսի, Աստանա, Քիշնև, Երևան, Սևաստոպոլ, Բաքու, Վլադիկավկազ, Դուշանբե և Բիշքեկ։
Այս մասին «Նովոստի-Արմենիա» գործակալությանը հայտնեց ԱՊՀ մասնակից-երկրների հումանիտար համագործակցության միջազգային հիմնադրամի մամուլի քարտուղար Ալեքսանդր Կալուգինը։
Հեռուստամարաթոնի ընթացքում կանցկացվեն ուղիղ միացումներ Կարմիր հրապարակից, Սևաստոպոլից ու Բրեստից։
Մոսկվայում այս տարի Կարմիր հրապարակի շքերթին մասնակցում են ՌԴ ԶՈՒ բոլոր տիպի ու տեսակի ներկայացուցիչներ, սալարկով կանցնեն ոչ միայն տանկերը, այլև ամենաժամանակակից սպառազինությունը, երկնքում՝ Մոսկվայի կենտրոնի վերևում 70 ինքնաթիռների և ուղղաթիռների թռիչք կցուցադրվի։
Հեռուսադիտողները կտեսնեն Սևծովյան նավատորմի ծովայինների շքերթը, որը կանցնի Սևաստոպոլում Նախիմովի հրապարկում, Սևծովյան նավատորմի ջրասույզների կողմից Հայրենական մեծ պատերազմի տարիներին սուզված նավերին ծաղկեպսակների դնելու արարողությունը, ինչպես նաև Բրեստ քաղաքում ծաղկեպսակներ դնելու և պատվո պահակների փոփոխման արարողությունը։
«ԱՊՀ հեռուստադիտողները կկարողանան տեսնել պատերազմի սկզբի իրադարձությունների վերաստեղծումը, լսել պատերազմի մասնակիցների կենդանի հիշողությունները, ծանոթանալ մեր ընդհանուր պատմության անհայտ էջերին»,- ասաց Կալուգինը։
Բացի «Միր» ՄՀՌԸ-ից 4 ժամ տևող հեռուստամարաթոնի հեռարձակումը, որը կսկսվի Երևանի ժամանակով առավոտյան 10։00-ին, կիրականացնեն ԱՊՀ երկրների առաջատար հեռուստաալիքները։ Եթերի հավանական լսարանը ավելի քան 250 մլն մարդ է։ -0-
