Պետրոսյանը հեռուստաընկերությունից 10 մլն դոլար է պահանջում իր կերպարը գովազդում օգտագործելու համար. թերթ

ԵՐԵՎԱՆ, 12 փետրվարի. /Նովոստի-Արմենիա/. Ռուս կատակերգու Եվգենի Պետրոսյանը ամերիկյան DirecTV և ռուսական ВГТРК հեռուստաընկերություններից 10 մլն դոլար է պահանջում իր կերպարը գովազդում օգտագործելու համար, ուրբաթ հայտնում է «Վեդոմոստի» թերթը։

Ինչպես տեղեկացնում է թերթը, ամերիկյան DirecTV Group (2008 թ.-ին շրջանառությունը 19,7 մլրդ դոլար է կազմել) արբանյակային հեռուստատեսության օպերատորի նկատմամբ հայցի լսումը ընթանում է Նյու Յորք քաղաքի արևելյան շրջանային դատարանում։ Ելնելով հայցից՝ 2007 թ.-ի հուլիսին ընկերությունը հեռուստատեսային փաթեթի գովազգային ակցիա է անցկացրել Նյու Յորքի ռուսախոս բնակիչների համար, որի ընթացքում տարածել է Պետրոսյանի պատկերը կրող թերթիկներ, հաղորդում է «ՌԻԱ Նովոստին»։

Կատակերգուն այս լուսանկարների օգտագործումը համարել է անօրինական և 2008 թ.-ի ապրիլին դատական հայց ներկայացրել DirecTV-ի նկատմամբ՝ վնասը գնահատելով 10 մլն դոլար։ Պետրոսյանը «Վեդոմոստիին» հայտնել է, որ այս գործի մասին մեկնաբանություններ անելու համար դեռ վաղ է։   

DirecTV-ի PR-տնօրեն Ռոբերտ Մերսերը հայտարարել է, որ ընկերությունը ոչ ոքի իրավունքները չի խախտել, վիճահարույց լուսանկարները տրամադրված են ռուսական ВГТРК հեռուստատեսության կողմից «РТР-планета» ալիքի մարքետինգային սատարման շրջանակներում։ Ալիքը մտնում է DirecTV-ի ռուսախոս փաթեթի մեջ, որով ցուցադրվում է Պետրոսյանի «Ծուռ հայելի» հեղինակային հաղորդումը։ Պետրոսյանի պահանջած գումարը ամերիկյան ընկերության ներկայացուցիչը «ծիծաղելի» է համարել։    

ВГТРК -ն, որը ներգրավված է որպես պատասխանակից, հայտարարել է, որ ինքը ունի բոլոր իրավունքները Պետրոսյանի կերպարը РТР-ի գովազդում օգտագործելու համար, բայց DirecTV-ին նրա լուսանկարները օգտագործել է սեփական ծառայությունները գովազդելու համար, ինչով էլ «կոպիտ խախտել է» գործընկերային համաձայնագիրը։ --0--