Վանդալները «նկարազարդել են» «Պղնձե հեծյալին»՝ Պետերբուրգի խորհրդանիշը

ԵՐԵՎԱՆ, 24 դեկտեմբերի. /Նովոստի-Արմենիա/. Վանդալները պղծել են Պետերբուրգ քաղաքի խորհրդանիշը՝ քաղաքի հիմնադիր Պետրոս Առաջինին նվիրված «Պղնձե հեծյալ» հուշարձանը, «ՌԻԱ Նովոստիին» հայտնել է Քաղաքային քանդակի թանգարանի տնօրեն Վլադիմիր Տիմոֆեևը։

«Այսօր հայտնաբերվել է, որ նժույգի քանդակի վրա վանդալները բառեր են գրել։ Մեր ռեստավրատորներն արդեն ուսումնասիրություն են կատարել, որպեսզի հասկանան հուշարձանի վրայի ներկի քիմիական բաղադրությունը և որոշեն, թե ինչով կարելի է հեռացնել այն»,- ասաց Տիմոֆեևը՝ չպարզաբանելով, թե ինչ են գրել վանդալները հուշարձանին։

Գրվածքները կմաքրվեն հուշարձանի վրայից արդեն վաղը։ «Այգ գրվածներին հասնելու և դրանք մաքրելու համար մենք ստիպված եղանք աշտարակ պատվիրել»,- հայտնեց տնօրենը։

Նա ընդգծեց, որ բազմաթիվ երկրներում գոյություն ունի օրենսդրություն, որի համաձայն վանդալիզմի նման ակտերը խստորեն պատժվում են։ «Ես համոզված եմ, որ պետք է լինեն նման գործողությունների համար պատիժ նախատեսող օրենքներ»,- ասաց Տիմոֆեևը։

Պղնձե հեծյալը՝ հյուսիսային մայրաքաղաքի հիմնադիր Պետրոս Առաջինին նվիրված հուշարձանը, ստեղծվել է Էտյեն Ֆալկոնեի նախագծով և կանգնեցվել քաղաքի կենտրոնում՝ Սենատի հրապարակում 1782 թվականին։ -0-