Թուրքիայում տեղի ունեցած Հայոց ցեղասպանության մասին ֆիլմը կցուցադրվի Կիևի միջազգային կինոփառատոնին

Իտալացի ռեժիսորներ Տավիանի եղբայրների՝ Օսմանյան Թուրքիայում Հայոց ցեղասպանության մասին պատմող «Արտույտների ագարակը» ֆիլմը կցուցադրվի նոյեմբերի 27-ին Կիևում բացվող մարդու իրավունքների պաշտպանությանը նվիրված «Աստիճաններ» միջազգային կինոփառատոնի շրջանակներում, հաղորդում է Ռուսաստանի հայերի «Երկրամաս» թերթի լրատվական կենտրոնը։

Փառատոնի ծրագրում ընդհանուր առմամբ ներառված է 100 ֆիլմ՝ աշխարհի 30 երկրներից, որոնցից 12-ը գեղարվեստական են, 50-ը՝ վավերագրական, 12-ը՝ կարճամետրաժ, 14-ը՝ անիմացիոն և 13-ը երաժշտական հոլովակներ են։

Փառատոնի հյուրերի թվում է հայտնի դերասան Արմեն Ջիգարխանյանը։

«Աստիճանները» ԱՊՀ երկրների տարածքում անցկացվող մարդու իրավունքների պաշտպանությանը նվիրված միակ միջազգային կինոփառատոնն է, որի ժամանակ իրավապաշտպան թեմատիկան ներկայացված է խնդիրների լայն շրջանակով։

Փառատոնին ցուցադրվում են մարդու իրավունքներին, կենդանիների և բնության պաշտպանությանը նվիրված ֆիլմեր, ինչպես նաև հոգևոր, փիլիսոփայան և սոցիալական թեմայով ֆիլմեր, քաղաքական խնդիրներ լուսաբանող ֆիլմեր։ Նմանօրինակ փառատոն է Artivist ամերիկյան փառատոնը, որն անցկացվում Հոլիվուդում։-0-