ՌԴ նախագահի թեկնածուները կզարմացնեն ընտրողներին հեռուստագովազդով՝ կոմունիստները խոստանում են ներկայացնել ՌԴ Կոմունիստական կուսակցության առաջնորդ Գենադի Զյուգանովին նոր կերպարում, Ժողովրդավարական կուսակցությունը կցուցադրի իր առաջնորդ Անդրեյ Բոգդանովի «տնային տեսաերիզները», իսկ Ռուսաստանի Լիբերալ-դեմոկրատական կուսակցությունը քարոզչության ընթացքում ոչ մի անգամ չի կրկնի իր գորվազդային հոլովակները, հաղորդում է «ՌԻԱ Նովոստին»։
Շաբաթ՝ փետրվարի 2-ին Ռուսաստանում կսկսվի լրատվամիջոցներով նախընտրական քարոզարշավը, որը կավարտվի ընտրություններից մեկ օր առաջ՝ փետրվարի 29-ին։ Այդ օրվանից սկսած օրենքով շաբաթվա աշխատանքային օրերին թեկնածուներին տրամադրվում է անվճար եթերաժամ հեռուստաալիքներում և այլ լրատվամիջոցներում, իսկ ազատ և տոնական օրերին քարոզչության համար թեկնածուները պետք է վճարեն։
Կոմունիստները, որոնք որպես նախագահի թեկնածու առաջադրել են իրենց առաջնորդ Զյուգանովին, պատրաստվում են շեշտը դնել հենց հեռուստագովազդի վրա։ Կուսակցությունը ծրագրում է օգտվել ոչ միայն անվճար հեռուստաեթերից, այլ նաև վճարել լրացուցիչ եթերի համար։ Իհարկե, ինչպես «ՌԻԱ Նովոստիին» տված հարցազրույցի ժամանակ նշել է ՌԴ Կոմունիստական կուսակցության առաջին փոխնախագահ Իվան Մելնիկովը, հեռուստաեթերի լրացուցիչ րոպեներ կոմունիստները կգնեն միայն այն դեպքում, եթե դրա համար բավական գումար լինի նախընտրական հիմնադրամում։
Ռուսաստանի Ժողովրդավարական կուսակցության (ՌԺԿ) առաջնորդ և նախագահի թեկնածու Անդրեյ Բոգդանովի (որը նախօրեին լրագրողներին խոստովանել է, որ ՌԴ նախագահի թեկնածու ընտրվելու դեպքում չի պատրաստվում դուրս գալ այն մասոնական օթյակից, որում գտնվում է) բոլոր նախընտրական գովազդային հոլովակները նկարահանված են «տնային տեսահոլովակների» ոճում։
Նախագահի թեկնածու, Ռուսաստանի Լիբերալ-դեմոկրատական կուսակցության առաջնորդ Վլադիմիր Ժիրինովսկու (որին առաջադրել են լիբերալ-դեմոկրատները) յուրաքանչյուր գովազդային հոլովակ լինելու է անկրկնելի բառից բուն իմաստով՝ կուսակցությունը պատրաստել է 80 գովազդային հոլովակ։-0-
