ԵՐԵՎԱՆ, 12 հունվարի./Նովոստի-Արմենիա/. Վրաստանի նախագահի թեկնածու Միխայիլ Սահակաշվիլին առաջարկում է բոլոր հայրենասիրական ուժերին, այդ թվում՝ ընդդիմությանը, միավորվել երկրի տնտեսական ր սոցիալական հիմնախնդրիների լուծման նպատակով։
«Մեր խնդիրն է բոլոր հայրենասիրական ուժերի հետ միասին Վրաստանը դարձնել միասանական և դուրս բերել աղքատությունից»,- շաբաթ օրը, երկրի արտահերթ նախագահական ընտրություններից հետո առաջին մամուլի ասուլիսի ժամանակ հայտնեց Սահակաշվիլին, հաղորդում է «ՌԻԱ Նովոստին»։
Վրաստանի կենտրոնական ընտրական հանձնաժողովի վերջին տվյալներով, հունվարի 5-ի նախագահական ընտրություններում Սահակաշվիլին հավաքել է ձայների 53,41 տոկոսը։ Նրա գլխավոր մրցակից, միավորված ընդդիմության թեկնածու Լևան Գաչեչիլաձեն հավաքել է 25,62 տոկոս ձայներ։ ԿԸՀ-ն ընտրությունների պաշտոնական արդյունքները հրապարակելու է հունվարի 13-ին։
Ինչպես նշել է Սահակաշվիլին, այսուհետև բոլոր քաղաքական գործընթացները Վրաստանում զարգանալու են ժողովրդավարության ճանապարհով։
«Առջևում խորհրդարանական ընտրություններն են, և մենք ընդդիմության հետ միասին պետք է հստակեցնենք ընտրությունների օրը»,- ավելացրել է նա։ Նախագահի ընտրություններին զուգահեռ անցկացված հանրաքվեի ժամանակ, նախնական տվյալներով, Վրաստանի քաղաքացիների մոտ 70 տոկոսը քվեարկել են խորհրդարանական ընտրությունները 2008թ. գարնանն անցկացնելու օգտին։
Երկրի ղեկավարության և անձամբ իր անունից Սահակաշվիլին հայտարարել է, որ պատրաստ է երկխոսություն սկսել ընդդիմության հետ և ոչ մեկի հանդեպ թշնամություն չի պահում։
«Ես հիշաչար մարդ չեմ։ Մենք կենտրոնացած ենք ապագայի վրա և անցյալի մասին չենք ցանկանում խոսել։ Վրաստանի զարգացումը պահանջում է հանգիստ, ժողովրդավարական զարգացում, և, հանուն դրա, բոլոր կողմերը պետք է փորձեն համաձայնության գալ»,- ասել է Սահակաշվիլին։
Վրաստանի նախագահի պաշտոնակատարի հայտարարության համաձայն, Սահակաշվիլու երդման արարողությունը (պաշտոնի ստանձնման) տեղի կունենա մոտավորապես հունվարի 20-21-ը։--0—
