ԵՐԵՎԱՆ, 30 հուլիսի. /Նովոստի-Արմենիա/. Քաղաքացին, իր վրա վառելիք լցնելով, ինքնահրկիզման փորձ կատարեց Բաղրամյան պողոտայում այս պահերին ընթացող բողոքի երթի ընթացքում։
Նա հրաժարվեց նստել ոստիկանական մեքենա, որը ժամանեց դեպքի վայր։ Այս պահին նրան փորձում են այլ փոխադրամիջոցով տեղափոխել հիվանդանոց։
Ոստիկանության աշխատակիցները շղթայել են Բաղրամյան պողոտան և փշալար են անցկացրել Սահմանադրական դատարանի առջև։
ՊՊԾ գնդի շենքի գրաված խմբին սատարող ցուցարարներն արգելափակել են պողոտայի երթևեկությունը, որտեղ գտնվում են կառավարական շենքերը, այդ թվում՝ Ազգային ժողովը և նախագահական նստավայրը։ Նրանք թույլ չեն տալիս անցնել ոստիկանական ոչ մի ավտոբուս։
Ցուցարարները հավաքվել են ի նշան պաշտպանության երկու շաբաթ առաջ ՊՊԾ գնդի շենքը զավթած «Սասնա ծռեր» խմբի։
Գործողությունների հետագա ծրագիրն առայժմ հայտնի չէ։ Նախօրեի երեկոյան Խորենացու փողոցում սկված խաղաղ երթն աստիճանաբար վերածվեց բողոքի ակցիայի մասնակիցների և ոստիկանության միջև բախումների։
Ոստիկանությունը կիրառեց հատուկ միջոցներ՝ արցունքաբեր գազ, լուսաձայնային նռնակներ, ճայթուկներ, մահակներ և այլն։ Վիրավորվել են մեծ թվով մասնակիցներ, ինչպես նաև լրագրողներ, ովքեր տեղափոխվել են քաղաքի հիվանդանոցներ։ Վնասվել է լրագրողական տեխնիկա։ -0-