ԵՐԵՎԱՆ, 21 փետրվարի. /Նովոստի–Արմենիա/. «Պրեստանս» հակահիպերտոնիկ կեղծ դեղամիջոցներ և «Ցեֆտրիաքսոն Աստերիա» կեղծ հակաբիոտիկ է հայտնաբերվել Երևանում և երկրի մի շարք մարզերում, երեքշաբթի լրագրողներին հայտնեց Առողջապահյության պետական տեսչության պետի պաշտոնակատար Սամվել Պորտոյանը։
««Աստերիա» ՍՊԸ–ն բողոք է ներկայացրել, որի հիման վրա մենք ստուգումներ ենք իրականացրել։ Դրանց արդյունքում հայտնաբերվել են «Ցեֆտրիաքսոն Աստերիա» կեղծ դեղամիջոցներ։ Կեղծման փաստը հաստատվել է փորձաքննության ժամանակ»,– նշեց Պորտոյանը։
Նա ընդգծեց նաև, որ Արմավիրի մարզում տեսչության նախաձեռնությամբ անցակցված ստուգումների արդյունքում հայտնաբերվել են «Պրեստանս» հակահիպերտոնիկ կեղծ դեղամիջոցներ։ Իսկականը կեղծից տարբերվում է սերիական համարով` օրիգինալի սերիական համարը յոթ թվերից է բաղկացած, իսկ կեղծինը` վեցից։
Պորտոյանի խոսքով, բոլոր նյութերը փոխանցվել են իրավապահ մարմիններին։
«Ցեֆտրիաքսոն Աստերիա» կեղծ դեղերը հայտնաբերվել են Երևանի, Արմավիրի, Շիրակի, Լոռու և Կոտայքի դեղատներում, իսկ «Պրեստանսը»` Երևանում, Շիրակում, Արմավիրում և Կոտայքում։ Մենք կշարունակենք քայելր ձեռնարկել Հայաստանում դեղամիջոցների շուկայի արդյունավետ վերահսկողության համար»,– ընդգծեց Պորտոյանը։
Նա նշեց, որ կեղծ դեղորայքի շրջանառությանն առնչվող անձանց սպառնում է քրեական պատասխանատվություն, ընդհուպ մինչև երեք տարվա ազատազրկում։
Հայաստանի ԱՆ առընթեր ակադեմիկոս Էմիլ Գաբրիելյանի անվան դեղորայքի և բժշկական տեխնոլոգիաների փորձաքննության կենտրոնի տնօրեն Հակոբ Թոփչյանն իր հերթին ավելացրեց, որ երկու դեղամիջոցի փորձաքննության վերջնական արդյունքները կհայտարարվեն մի քանի օրից։
«Մենք կոչ ենք անում այդ դեղամիջոցներն արդեն ձեռք բերած անձանց ուշադիր ուսումնասիրել դրանք և, նկատելով տարբերությունն իսկականից, դադարեցնել դրանց օգտագործումը»,– ավելացրեց Թոփչյանը, հայտնելով, որ այս պահին բոլոր կեղծ դեղամիջոցները առգրավվում են դեղատներից։ -0-
Ծանոթացեք լուրերին առաջինն ու քննարկեք դրանք մեր Telegram-յան ալիքում
