«Կանաչները» մասամբ փակել են Բաղրամյանի պողոտան, ոստիկանությունն ուժ է կիրառել (ՎԻԴԵՈ)

ԵՐԵՎԱՆ, 19 օգոստոսի. /Նովոստի-Արմենիա/. Ամուլսարի ոսկեբեր հանքավայրի շահագործման վերսկսման դեմ բողոքի ակցիայի մասնակիցները մասամբ փակել են Բաղրամյան պողոտան, հայտնել է «Նովոստի–Արմենիա»–ի թղթակիցը։

Օգոստոսի 19–ի առավոտյան նախագահականում անցկացվել է խորհրդակցություն Ամուլսարի հարցի շուրջ, որին ասնակցել է ՀՀ վարչապետ Նիկոլ Փաշինյանը, Վայոց Ձորի մարզպետ Տրդատ Սարգսյանը, համայնքների ղեկավարները, ԱԺ խմբակցությունների ներկայացուցիչները և բնապահպանները:

Թղթակցի տեղեկացմամբ, խորհրդակցության արդյունքներով չհաջողվեց հասնել կոնսենսուսի` կառավարությունը մտադրություն է հայտնել թույլ տալ հանքավայրի շահագործման վերսկսումը։

Խորհրդակցության ավարտից հետո ցուցարարները շարժվել են դեպի Ազգային ժողովի շենք, սակայն ոստիկանները թույլ չեն տվել նրանց մտնել այգու տարածք անվտանգության նկատառումներով, ինչից հետո ակցիայի մասնակիցները որոշել են երթով շարժվել հենց փողոցով։
Փողոցի մասնակի արգելափակումից րոպեներ անց ցուցարարներին շրջապատել են «կարմիր բերետները», որոնք փորձել են նրանց ուղղորդել դեպի մայթ։

Ոստիկանությունը սկսել է ուժ կիրատել և մի քանի ակտիվիստի բերման է ենթարկել։
Ինչպես պարզել է «Նովոստի–Արմենիա» –ի թղթակիցը, վարչապետ Նիկոլ Փաշինյանը խորհրդակցություն է անցկացնում «Քաղաքացիական պայմանագիր» կուսակցության անդամների հետ։


Ամուլսարի հանքավայրը գտնվում է Ջերմուկ քաղաքի հարևանությամբ։ Բնապահպանները և շարքային քաղաքացիները մտահոգված են, որ հանքավայրի շահագործումը կարող է հանգեցնել Ջերմուկի և Սևանի ստորգետնյա ջրերի աղտոտմանը` դառնալով մասշտաբային բնապահպանական աղետի պատճառ` անդառնալի հետևանքներով։

Ամուլսարի հանքավայրի աշխատանքը, որի շահագործմամբ զբաղվում է Lydian Armenia ընկերությունը, արդեն կես տարուց ավելի է, ինչ դադարեցված է` Ջերմուկում և Սևանում շրջակա միջավայրի վրա ազդեցության փորձագիտական գնահատական ստանալու նպատակով։

Օգոստոսի 15–ին Հայաստանի քննչական կոմիտեի ղեկավար Հայկ Գրիգորյանը ներկայացրել է միջազգային փորձագիտական խմբի եզրակացությունը, որի համաձայն, բնապահպանական սպառնալիքներ չկան, իսկ հավանականները հնարավոր է վերահսկել քայլերի ձեռնարկմամբ։

Փորձաքննությունն անցկացվել է Earth link & Advanced Resources Development (ELARD) ընկերությունը Քննչական կոմիտեում 2018 թվականի հուլիսի 20–ին հարուցված քրեական գործի շրջանակում։ Փորձաքննության նպատակն Ամուլսարի հանքավայրի շահագործման բնապահպանական և սոցիալական ազդեցության գնահատումն է։ -0-