ԵՐԵՎԱՆ, 28 նոյեմբերի./Նովոստի-Արմենիա/. Իշխանություններն պարտավոր են բացատրել, մանրամասն պարզաբանել՝ այս պատերազմից հետո մեր երկրի սահմանների հետ կապված ինչ կոնկրետ զարգացումներ կամ լուծումներ են նախատեսված։ Այս մասին հայտնում է ՀՀ Մարդու րավունքների պաշտպան Արման Թաթոյանը:
«Ու դա նրանք չպետք է անեն այն պատճառով, որ ստիպված են չեզոքացնել մեր երկրի անվտանգությանն առնչվող անսպասելի զարգացումների հետևանքները կամ մեղմել հանրության զայրույթն այդ անսպասելի զարգացումների կապակցությամբ: Պետք է ի վերջո գիտակցել, որ խոսքը մեր պետության պաշտպանության, մեր ժողովրդի ու յուրաքանչյուր անձի ֆիզիկական անվտանգության ու ապահովության մասին է»,- նշել է Թաթոյանը:
Նրա խոսքով, չի կարելի հանրությանը պահել անորոշության մեջ, մարդկանց ու հատկապես սահմանային գյուղերի բնակիչների համար ստեղծել տագնապային վիճակներ ու այդ ամենով խաթարել հոգեկան անձեռնմխելիությունը, մարդկանց պահել անընդհատ լարվածության մեջ։
«Սրանք պետության ուղիղ պարտավորություններն են, պոզիտիվ պարտավորությունները յուրաքանչուր մարդու հանդեպ»,- նշել է Թաթոյանը:
Սոթքի շուրջ ստեղծված իրավիճակի մասին
Նախօրեին ԶԼՄ–ներն ու պատգամավորները հայտնել էին, որ Քարվաճառի սահմանին դարպասները կոտրվել են և ադրբեջանական կողմն առաջ է գալիս, Վարդենիսի շրջանում տեղակայված Սոթքի ոսկու հանք են ներթափանցել տասնյակ ադրբեջանցի զինծառայողներ։
ՀՀ ՊՆ–ն իր հերթին հերքեց շրջանառվող լուրերը` նշելով, որ տարբեր լրատվամիջոցներով շրջանառվող լուրերը, թե ադրբեջանցի զինվորականներ են ներխուժել Սոթքի ոսկու հանքավայր և աշխատակիցներից պահանջել ազատել տարածքը` չեն համապատասխանում իրականությանը:
Ուշ երեկոյան ՀՀ ԶՈւ ԳՇ պետի առաջին տեղակալ Տիրան Խաչատրյանը հանդես եկավ ասուլիսով` պարզաբանելով, որ Սոթքի հանքի մի մասը պատկանում է կիսով չափ հայկական կողմին, կիսով չափ ընկնում է Ադրբեջանի տարածքում: Նա նաև տեղեկացրեց, որ հանքի շահագործմամբ զբաղվող ԳեոՊրոՄայնինգ ռուսական ընկերությունը տեղադրել է անցակետեր` իր անվտանգությունն ապահովելու համար և վարել է բանակցություններ ադրբեջանական կողմի հետ։ Նրա խոսքով, ադրբեջանական կողմը տեղադրել է երեք դիտակետ հանքի երկայնքով։
Սահմանագծման մասին
Մարտական հերթապահության իրականացման նպատակով՝ նոյեմբերի 27-ին Հայաստանի և Ադրբեջանի զինված ուժերի միջև տեղի է ունեցել ժամանակավոր մարտական հենակետերի փաստացի տեղակայման կետերի հստակեցում: Պետական սահմանի սահմանագծումը և սահմանազատումը տևական, համալիր գործընթացներն են, որոնք իրականացվում են պետությունների միջև ձևավորվող համատեղ միջգերատեսչական հանձնաժողովների և աշխատանքային խմբերի կողմից՝ միջպետական բանակցությունների ճանապարհով, որի արդյունքում կնքվում է համապատասխան միջազգային փաստաթուղթ:–0–