ԵՐԵՎԱՆ, 28 հունվարի․ /Նովոստի-Արմենիա/․ Հայ հասարակությունը անհանգստացած է մի շարք հասարակական - քաղաքական գործիչների ոստիկանություն բերման ենթարկելու լուրով։ Նրանք հայտնի են իրենց ընդդիմադիր գործունեությամբ և իշխանության հանդեպ քննադատություններով։
Ավել վաղ հայտնի էր դարձել, որ հայտնի բլոգեր, «ՎԵՏՕ» քաղաքացիական նախաձեռնության հիմնադիր և հակասորոսական ակտիվիստ Նարեկ Մալյանին և «Ադեկվադ» ընդդիմադիր կուսակցության ղեկավար Կոնստանտին Տեր-Նակալյանին բերման են ենթարկել ոստիկանություն՝ պաշտոնական տվյալներով ապօրինի զենք պահելու կամ կրելու կասկածանքով։
«Քաղաքացիական գիտակցություն» ՀԿ-ի անդամ Նարեկ Սիմոնյանն ասել է, որ պատահածը ակնհայտ քաղաքական ճնշում է և հայտնել է տեղի ունեցածի պատճառը։
«Նիկոլ Փաշինյանը՝ լինելով բանակից խուսափած, մեծամասամբ դասալիքների կառավարության դասալիք ղեկավար, բանակի օրով այսպիսի «մասկի շոու» է սարքել բանակում երկարամյա ծառայություն անցած մարդու նկատմամբ։ Համարենք, որ սա Նիկոլ Փաշինյանի յուրահատուկ վրեժն է»,- կարծում է Սամսոնյանը։
Նա հիշեցրեց, որ Մալյանի երեկվա հայտարարությունը ուղղակիորեն մերկացնում էր ՀՀ Անվտանգության խորհրդի քարտուղար Արմեն Գրիգորյանի «Հիբրիդային պատերազմն» ընդդեմ Ռուսաստանի։
Սամսոնյանը սպասում է, որ իրեն նույնպես բերման կենթարկեն, հավելելով, որ ընդդիմության դեմ հաճախակի սպառնալիքներ են հնչում։
Զենք չի հայտնաբերվել
Մալյանի փաստաբան Ռուբեն Մելիքյանն իր Facebook-յան էջում գրառում է կատարել, որ Մալյանի անձնական խուզարկությամբ զենք, այլ ապօրինի իրեր չեն հայտնաբերվել։
«Ժամը 13:30-ի սահմաններում բերման է ենթարկվել ապօրինի զենք պահելու կասկածով»,- գրել է Մելիքյանը Facebook-ում։
«Ադեկվադներին» բերման ենթարկելը
«Ադեկվադ» ընդդիմական կուսակցության Facebook-յան էջում արված հայտարարության մեջ ասվում է, որ առևանգվել են նաև «Ադեկվադ»–ի համահիմնադիրներ Արթուր Դանիելյանը և Կոնստանտին Տեր-Նակալյանը։
«Ռեպրեսիվ ռեժիմը գործի է դրել իր ուժային և քարոզչական ողջ զինանոցը ընդդիմախոսներին լռեցնելու, ահաբեկելու և վախի մթնոլորտ տարածելու նպատակով»,- ասվում է գրառման մեջ։
Մասնագետի կոչը
Իրավագետ, սահմանադրական իրավունքի մասնագետ Գոհար Մելոյանը կոչ է արել Հայաստանի մարդու իրավունքների պաշտպան Արման Թաթոյանին՝ հետևել իրավիճակին։
«Իրավունքի գերակայությունն այլևս արդիական չէ մեր երկրում։ Այլախոհությունն ու այլակարծությունը ճնշվում և հետապնդվում են»,- գրել է Մելոյանն իր Facebook-յան էջում։
Նա կոչ է արել բոլոր իրավապաշտպաններին, հասարակական կազմակերպություններին, միջազգային կառույցների ներկայացուցիչների հետևել տեղի ունեցող գործընթացներին և տալ համարժեք գնահատականներ։-0-
