Հայաստանի նախագահը վարչապետ նշանակեց

ԵՐԵՎԱՆ, 18 մայիսի. /Նովոստի–Արմենիա/. Հայտնի է դարձել նոր կառավարության ղեկավարի անունը։

Ինչպես հայտնում է Հայաստանի նախագահի մամուլի ծառայությունը, հանրապետության նախագահը հրամանագիր է ստորագրել Կարեն Կարապետյանին Հայաստանի վարչապետ նշանակելու մասին։

Կարեն Կարապետյանը ծնվել է 1963 թվականի օգոստոսի 4–ին Ստեփանակերտում։ 1970-1980 թվականներին սովորել է Երևանի Լև Տոլստոյի անվան թիվ 128 դպրոցում, 1980-1985 թվականներին՝ Երևանի պետական համալսարանում: 1989 թվականին Կարապետյանին շնորհվել է տնտեսագիտական գիտությունների թեկնածուի կոչում: Կարեն Կարապետյանը 32 գիտական աշխատանքների հեղինակ է:

Կարեն Կարապետյանը 1985-1990 թթ. եղել է ՀՀ Պետպլանի հաշվողական կենտրոնի կրտսեր գիտաշխատող, այնուհետև գիտաշխատող, սեկտորի վարիչ, միաժամանակ դասավանդել է ԵՊՀ-ում։ 1990-1996 թթ. եղել է գիտության և մշակույթի գործիչների ասոցիացիայի «Հայաստան-88», «Սիգմա» ՊՁ, ԳԱՄ «Լիմենս» ԿԻՏԿ, «Բայթ» ՊՁ փոխտնօրեն, «Հրազդան» բաժնետիրական բանկի նախագահի տեղակալ։ 1996-1998 թթ. եղել է «Հայէներգո» ՊՁ, գլխավոր տնօրենի տեղակալ, 1998-2001 թթ.՝ «Հայէներգո» ՓԲԸ գլխավոր տնօրեն, 2001-2010 թթ.` «ՀայՌուսգազարդ» ՓԲԸ, վարչության նախագահ-գլխավոր տնօրեն։ 2011-2016 թթ. «Գազպրոմբանկ» ԲԲԸ առաջին փոխնախագահն է։ 2013 թվականից «ԱՌԷԿՍԻՄԲԱՆԿ-ԳԱԶՊՐՈՄԲԱՆԿԻ ԽՈՒՄԲ» Խորհրդի անդամ է։

2010-2011 թթ. եղել է Երևանի քաղաքապետ։ 2016 թվականի սեպտեմբերի 13–ից Հայաստանի վարչապետն է։

Ամուսնացած է, ունի երեք երեխա: -0-