ԵՐԵՎԱՆ, 25 նոյեմբերի. /Նովոստի–Արմենիա/. Ոսկան Երևանցու տպագրությամբ հայերեն առաջին Աստվածաշնչի (1666թ.) 350-ամյակը և Հովհաննես Այվազովսկու (1817-1900թթ.) ծննդյան 200-ամյակն ընդգրկվել են Հռչակավոր մարդկանց և կարևոր իրադարձությունների ՅՈՒՆԵՍԿՕ-ի 2016-2017թթ. օրացույցի մեջ, հայտնում է Հայաստանի ԱԳՆ կայքը։
Որոշումը կայացվել է Փարիզում՝ ՅՈՒՆԵՍԿՕ-ի կենտրոնակայանում, նոյեմբերի 4-ից 18-ը տեղի ունեցած Գլխավոր կոնֆերանսի 38-րդ նստաշրջանի ընթացքում:
Հայաստանի Հանրապետության կողմից ներկայացված «Ոսկան Երևանցու տպագրությամբ հայերեն առաջին Աստվածաշնչի (1666թ.) 350 ամյակը» հայտը ստացել է Ֆրանսիայի Հանրապետության և Նիդերլանդների Թագավորության աջակցությաունը, իսկ Ռուսաստանի Դաշնության հետ համատեղ ներկայացված «Հովհաննես Այվազովսկու (1817-1900թթ.) ծննդյան 200-ամյակը» հայտը՝ Իտալիայի Հանրապետության աջակցությունը:
Այսպիսով, 1998 թվականից առ այսօր Հռչակավոր մարդկանց և կարևոր իրադարձությունների ՅՈՒՆԵՍԿՕ-ի օրացույցում ներառվել է Հայաստանի Հանրապետության կողմից ներկայացված 21 հոբելյանական տարեթիվ:
Հայոց լեզվով առաջին տպագիր Աստվածաշունչը 1666 թվականին հրատարակել է Ոսկան Երևանցին Ամստերդամում Հայ առաքելական եկեղեցու տպագրատանը։ Գիրքը լույս է տեսել այն ժամանակի համար հսկայական տպաքանակով` 5000 օրինակ։ Դրանցից երկուսը հրատարակվել են հատուկ ուշադրությամբ` ձեռքով է կազմվել, իսկ կազմի վրա պատկերվել է Հիսուս Քրիստոսին գրկած Աստվածամայրը։ Այդ Աստվածաշունչները նվիրաբերվել են ֆրանսիացի Լյուդովիկոս 14–րդ թագավորին և Կլեմենտոս 9–րդ Հռոմի Պապին։ -0-