ԵՐԵՎԱՆ, 20 ապրիլի. /Նովոստի-Արմենիա/. ՀՀ վարչապետ Կարեն Կարապետյանը հինգշաբթի կառավարության նիստի ժամանակ առաջարկել է արգելված վայրերում աղբ նետելու համար քրեական պատասխանատվություն սահմանել։
Կառավարության ղեկավարը հանձնարարել է արդարադատության նախարարին երկու ամսվա մեջ ներկայացնել համապատասխան օրենսդրական առաջարկներ, որոնք պատասխանատվության ենթարկելու ավելի հստակ նորմեր կպարունակեն: Նա նաև հանձնարարել է մի շարք գերատեսչությունների ղեկավարներին միջոցներ ձեռնարկել աղբահանման և սանիտարական պատշաճ մաքրման համար:
Կարապետյանը ողբերգական է անվանել երկրում աղբահավաքման իրավիճակը, նշելով, որ «Մաքուր Հայաստան» նախաձեռնության շրջանակում իրականացված հետազոտության տվյալներով պարզվել է, որ աղբանոցները Հայաստանում զբաղեցնում են ավելի քան 430 հա տարածություն: «Այդ աղբանոցները պատշաճ ձևով չեն վերահսկվում», - ընդգծեց վարչապետը:
Նրա խոսքով, աղբահավաքման աշխատանքների կազմակերպման գործում, մասնավորապես, մեղավոր են Հայաստանի համայնքների և մարզերի ղեկավարները, ովքեր վատ են կատարում իրենց պարտականությունները: «Նրանք պատասխանատու են ոչ միայն աղբահավաքման աշխատանքների պատշաճ կազմակերպման, այլ նաև ստեղծված իրավիճակի կարգավորման, աղբահավաքի և դուրս բերման համար», - հայտարարեց Կարապետյանը:
Նա ընդգծեց, որ խնդիրները հարկավոր է լուծել համատեղ ծրագրերի միջոցով` համայնքների և մարզերի ղեկավարության հետ միասին, նշելով, որ անհրաժեշտ է անհապաղ սկսել «Մաքուր Հայաստան» ծրագրի իրականացումը:
«Հանրապետության կատարողական մարմինների ղեկավարներին հանձնարարում եմ երկու ամսում քայլեր ձեռնարկել` աղբահանության և սանիտարական մաքրման հետ առկա խնդիրների վերացման համար», - ավելացրեց Կարապետյանը:
Բացի այդ, նա հանձնարարել է ՀՀ ոստիկանապետ Վլադիմիր Գասպարյանին Ճանապարհային ոստիկանության ուժերով և Պարեկային ծառայության հետ համատեղ ձեռնարկել անհրաժեշտ բոլոր քայլերը` արգելված վայրերում աղբ թափելը կանխարգելելու նպատակով:
Կարապետյանի խոսքով, Հայաստանն այցելող զբոսաշրջիկները գոհ են ամեն ինչից, բացի աղբահանության իրավիճակից:
Դիմելով տնտեսական զարգացման և ներդրումների նախարար Սուրեն Կարայանին` վարչապետը նշեց Սևանա թերակղզու անբարենպաստ վիճակը, որը ակտիվ տուրիսատական գոտի է` ավելացնելով, որ այս հարցը անհապաղ լուծման կարիք ունի: -0-
Ծանոթացեք լուրերին առաջինն ու քննարկեք դրանք մեր Telegram-յան ալիքում
