Երևանցիները նշել են, թե ո՞րն է քաղաքի հիմնական խնդիրը. հարցում

ԵՐԵՎԱՆ, 11 փետրվարի./Նովոստի-Արմենիա/. Այսօր Երևանի առջև ծառացած գլխավոր խնդիրը, երևանցիների կարծիքով, հասարակական տրանսպորտն է։ Այս մասին են վկայում «GALLUP International Association»-ի հայաստանյան ներկայացուցչության ղեկավար Արամ Նավասարդյանի ներկայացրած հարցման տվյալները։

Մայրաքաղաքի առջև ծառացած կարևորագույն խնդիրներից քաղաքացիները առաջնային են համարել հասարակական տրանսպորտը (35.8%), աղբը (22.9%), գնաճը (17.6%), գործազրկությունը (11%), էկոլոգիան (9%), կանաչ տարածքների բացակայությունը (7.2%) և այլն:

Քաղաքի բնակիչները կարծում են, որ անհրաժեշտ են ավելի շատ ավտոբուսներ (64.2%), երթուղայիններ (14.2%), տրոլեյբուսներ (10.7%), տրամվայներ (6.7%)։ Իսկ 23.1%-ը կարծում է, որ անհրաժեշտ է զարգացնել մետրոն։

Հարցվածների 12.3%-ը վերջին մեկ տարվա ընթացքում քաղաքի փոփոխությունները գնահատել է ամբողջությամբ դրական, 45.8%-ը՝ ավելի շուտ դրական, 20.6%-ը՝ ավելի շուտ բացասական, իսկ հարցվածների 12%-ը լիովին բացասական է գնահատել փոփոխությունները։

Հարցվածներին խնդրել են նաև թվարկել քաղաքապետարանի կողմից իրականացված դրական փոփոխությունները։ Նրանք նշել են աղբահանության կազմակերպումը (39.5%), նոր ավտոբուսները և երթուղիները (35.3%), հին վերելակների փոխարինումը (12%), այգիների բարեկարգումը (8.7%) և կանաչ տարածքների ավելացումը(6.5%):

Հարցին, թե քաղաքացիները ինչ միջոցառումներ կցանկանային, որպեսզի քաղաքապետարանը իրականացներ, նրանք նշել են կանաչ տարածքների ընդլայնումը (18.5%), քաղաքի մաքրումը և շաբաթօրյակների անցկացումը(16%), մշակութային ծրագրերը (14.2%), մանկական միջոցառումները (9.7%), խաղահրապարակների կառուցումը (8,4%), մարզական (6%), ինչպես նաև երիտասարդական (5,7%) միջոցառումների կազմակերպումը:
Երևանցիները կարծում են, որ Երևանում զբոսաշրջության զարգացման համար անհրաժեշտ է ավելացնել կանաչ տարածքները (11.6%), պահպանել հին շինությունները (8.9%), պահպանել քաղաքի մաքրությունը (8.1%), բացառել զբոսաշրջիկների համար արհեստական թանկացումներն (7.7%) ու հին Երևանի վերականգնումը (7.2%):

Հարցվածների ճնշող մեծամասնությունը (50.9%) ավելի դրական է գնահատել քաղաքի ընդհանուր արտաքին տեսքը, ևս 16.2%-ը լիովին գոհ է մայրաքաղաքի արտաքին տեսքից։

Հարցումն անցկացվել է Երևանում հունվարի 24-ից փետրվարի 2-ը, շուրջ 800 քաղաքացիների շրջանում։-0-