Վանեցյանը հայտարարել է, որ իշխանությունները գաղտնալսում են իր սմարթֆոնը (ՖՈՏՈ)

ԵՐԵՎԱՆ, 24 նոյեմբերի./Նովոստի–Արմենիա/. ԱԱԾ նախկին տնօրեն, «Պատիվ ունեմ» ընդդիմադիր խմբակցության ղեկավար Արթուր Վանեցյանը մեղադրել է իշխանություններին իր սմարթֆոնը գաղտնալսելու մեջ։

Վանեցյանն իր Facebook–յան էջում տեղեկացրել է, որ Apple ընկերությունից նամակ է ստացել, որի screen–երը հրապարակել է Facebook–ում։

«Այս նամակը հաստատում է իմ նախկին hայտարարություններն այն մասին, որ Հայաստանի գործող իշխանություններն ապօրինաբար, խախտելով իմ անձնական և ընտանեկան կյանքի անձեռնմխելիության իրավունքը, տևական ժամանակ գաղտնալսման փորձեր են իրականացրել, որոնք ակնհայտորեն կապված են իմ քաղաքական գործունեության հետ», – հայտարարել է նա։

Վանեցյանի խոսքով, նա փաստացի տվյալներ ունի այն մասին, որ հարձակում է իրականացվել տխրահռչակ Pegasus ծրագրով ոչ միայն իր, այլև մերձավոր շրջապատի և ընտանիքի անդամների հեռախոսների վրա։



Ինչպես գրում են միջազգային ԶԼՄ–ները, Pegasus ծրագրային ապահովումը ստեղծվել է NSO Group իսրայելական ընկերության կողմից և 2016թ.–ից օգտագործվում է տասնյակ երկրների հետախուզական ծառայությունների, իրավապահ մարմինների և զինծառայողների կողմից։ BBC–ի ռուսական ծառայության տվյալներով, լրտեսման զոհ են դարձել իրավապաշտպաններ, ընդդիմադիր քաղաքական գործիչներ, լրագրողներ, փաստաբաններ, ձեռներեցներ, պաշտոնյաներ։

«Իմ, հնարավոր է նաև ՀՀ այլ քաղաքացիների նկատմամբ իրականացված ապօրինի գործողությունների հետ կապված հրավիրում եմ ՀՀ մարդու իրավունքների պաշտպան Արման Թաթոյանի ուշադրությունը», – նշել է Վանեցյանը։

Կիբերանվտանգության հայտնի մասնագետ Ռուբեն Մուրադյանն այսօր զգուշացրել է, որ Հայաստանում արձանագրվել են Apple–ի կողմից Pegasus–ի զոհերին ուղարկված նախազգուշական (alert) ծանուցումների փաստեր։



 «Apple–ը սկսել է նախազգուշական նամակներ ուղարկել Pegasus–ի զոհերին։ Հայաստանում երեկոյան առնվանզ երկու մարդ ստացել է նման ծանուցումներ», – գրել է նա իր Facebook–յան էջում։–0–