ՊՆ–ն մեկնաբանել է «Էրեբունի» օդանավակայանում բռնկված հրդեհը

ԵՐԵՎԱՆ, 4 նոյեմբերի./Նովոստի–Արմենիա/. ՀՀ պաշտպանության նախարարությունը հանդես է եկել հայտարարությամբ երկուշաբթի «Էրեբունի» օդանավակայանի տարածքում բռնկված հրդեհի կապակցությամբ։

Ինչպես հաղորդել էինք ավելի վաղ, նոյեմբերի 4-ին, ժամը 14:33-ին «911» ծառայություն ահազանգ է ստացվել, որ Երևան քաղաքի Էրեբունի օդանավակայանում այրվում է անգարի տանիք: Դեպքի վայր են մեկնել ԱԻՆ ՓԾ Երևան քաղաքի փրկարարական վարչության հրշեջ-փրկարարական ջոկատից 10 մարտական հաշվարկ, մեկ ջրատար ավտոմեքենա և ճգնաժամային կառավարման ազգային կենտրոնի արտակարգ իրավիճակների արձագանքման խումբը: Հրդեհը մեկուսացվել է ժամը 15:41-ին, մարվել՝ 16:27։ 

«Շենքը շատ հին է, 2 հարկ, տանիքները ամբողջը փայտե։ Հանձնված է Արմ-Աէրո ՓԲՀ-ին, իրային պահեստ, նախնական տվյալով՝զորամասին պատկանող ավիացիոն գույք չկա։ Այրված բենզոտարը ևս ՊՆ-ին չի պատկանում», – գրել է ՀՀ ՊՆ մամուլի քարտուղար Արծրուն Հովհաննիսյանը Facebook–յան իր էջում։

Նշենք, որ «Էրեբունի» օդանավակայանում գտնվում է Հարավային ռազմական օկրուգի 3624–րդ ռուսական ավիաբազան։–0–