Մայր Աթոռը հաստատում է հոգևորականների մասնակցությունն ընդդիմության այսօրվա հանրահավաքին

ԵՐԵՎԱՆ, 1 մայիսի․/Նովոստի-Արմենիա/․ Մայր Աթոռի տեղեկատվական կենտրոնի պատասխանատու տեր Եսայի քահանա Արթենյանն անդրադարձել է ընդդիմության այսօրվա հանրահավաքին քահանաների մասնակցությաան մասին տեղեկություններին։

"Ի պատասխան հանրահավաքին հոգևորականների մասնակցության հարցերին։ Այսօր՝ մայիսի 1-ին, Երևանում նախատեսված հանրահավաքին հոգևորականների մասնակցության վերաբերյալ լրատվականների հարցերին ի պատասխան ցանկանում եմ ընդհանրացված տեղեկացնել հետևյալը։

Հոգևորականները, ինչպես քաղաքական զանգվածային նախընթաց միջոցառումներին, ներկա են լինելու նաև այսօրվա հանրահավաքին՝ հնարավոր լարվածությունները մեղմելու և հանդարտության մթնոլորտի պահպանմանը նպաստելու համար", - նշել է Արթենյանը:

Մայր Աթոռը հորդորում է հանրահավաքի մասնակիցներին և իրավապահ մարմինների ներկայացուցիչներին հանդես բերել զգոնություն ու խիստ պատասխանատվություն և զերծ մնալ սադրանքներին տրվելուց:

"Աղոթում ենք Հայաստան և Արցախ մեր հայրենիքի ապահովության ու անվտանգության, մեր ժողովրդի բարօր կյանքի համար", - նշել է Մայր Աթոռի տեղեկատվական կենտրոնի պատասխանատուն։-0-