Կոկորդիլոսը չունի ստամոքս, ունի քարաճիկ, ինչ–որ ժամանակ այն թռչել է. Արարատի մարզպետ

ԵՐԵՎԱՆ, 12 հունիսի./Նովոստի–Արմենիա/. Արարատի մարզպետ Գարիկ Սարգսյանն այսօր ԱԺ–ում խոսել է մարզում բացվող կոկորդիլոսաբուծարանի մասին։

Նրա խոսքով, այն իրենից ներկայացնելու է էկոայգի` ալիքային լողավազանով, հեծանվային հրապարակով, մանկական հրապարակով, արագ սննդի կետերով, ռեստորաններով։

Անդրադառնալով կոկորդիլոսի ձվերի ներմուծման գործընթացին` Սարգսյանը նշեց. «Քանի որ մենք չունենք մաքսային կոդ` նախատեսված կոկորդիլոսի ձվի մասով, ունենք միայն մաքսային կոդ` թռչնի ձվի մասով, ապա կոկորդիլոսի ձուն ներմուծվում է թռչնի ձվի կոդի տակ»։

«Կոկորդիլոսն իր կազմվածքով, իր ամբողջ օրգան համակարգերով, մոտ է թռչուններին։ Կոկորդիլոսը չունի ստամոքս, ունի քարաճիկ, ինչ–որ ժամանակ կոկորդիլոսները թռչել են։ Օրինակ եթե ինչ–որ ժամանակ ձկներ են նույնիսկ եղել, որոնք թևեր են ունեցել, հիմա նրանք ջրի մեջ լողում են, թեփուկներ ունեն, դա չի նշանակում, որ նրանք ինչ–որ ժամանակ այլ խմբի չեն դասվել», – նշեց մարզպետը։–0–