«Խնդրում եմ մի պահ իջեք օդից»․ Հայկ Մարությանը Փաշինյանի Facebook–յան հրապարակման տակ հարց է ուղղել տրանսպորտի թանկացման մասին

ԵՐԵՎԱՆ, 12 հունվարի․/Նովոստի–Արմենիա/․ Երևանի նախկին քաղաքապետ Հայկ Մարությանը մեկնաբանել է ՀՀ վարչապետ Նիկոլ Փաշինյանի Facebook–յան հրապարակումն այն մասին, որ ԵՄ-ից ստացած տվյալներով 2018-ից ի վեր ՀՀ-ից դեպի ԵՄ օդային տրանսպորտով ուղևորահոսքը աճել է շուրջ 400 տոկոսով։
«Էդ օդայինը հասկացանք, հիմա խնդրում եմ մի պահ իջեք օդից և մեզ` գետնի վրա և անգամ գետնի տակ երթևեկողներիս պատասխանեք: Գրում եմ այստեղ՝ դիմելով ՀՀ կառավարության ղեկավարին եւ մի մարդու, որը 2018-ին սոցիալական արդարության գաղափարներով, ժողովրդական ընդվզման ալիքի վրա եկավ իշխանության», – գրել է Մարությանը որպես մեկնաբանություն Փաշինյանի հրապարակման տակ։
Նա հիշեցրել է որ Երեւանի քաղաքապետարանն արդեն մեկ տարի է՝ տրանսպորտի թանկացման ծրագիր է ընդունել եւ մտադիր է փետրվարի 1-ից գործի դնել այն։
«Առանց մանրամասնությունների մեջ խորանալու (վստահ եմ, դրանց հետ ծանոթանալու հնարավորություն ունեք), նշեմ, որ այս թանկացմանը դեմ է Երեւանի բնակչության ճնշող մասը։ Բավական է ասել, որ դեկտեմբերին ոչ մեծաթիվ խմբի հետ ես ստորագրահավաք եմ արել եւ հավաքել ենք թանկացման դեմ ավելի քան 76 000 ստորագրություն։ Դա ավելին է, քան ՔՊ-ն հավաքել է 2023-ի Երեւանի ավագանու ընտրություններին», – նշել է Մարությանը։
Նա վստահեցրել է, դրանից մի քանի անգամ ավելին էլ կարող ենք հավաքել։
«Թանկացումը որեւէ կերպ հիմնավորված չէ նաեւ ֆինանսական հաշվարկներով․ մենք արդեն իսկ բացատրել ենք, թե ինչպես կարելի է զարգացնել Երեւանի տրանսպորտը՝ առանց սոցիալապես ամենախոցելի խավի գրպանին դիպչելու։ Երեւանում ձեր վստահորդ Տիգրան Ավինյանը մեր փաստարկներին ի պատասխան ասել է, թե իրեն չի հետաքրքրում հարյուր հազարավոր քաղաքացիների կարծիքը՝ ինքը թանկացումը մինչեւ վերջ տանելու է։ Մենք նաեւ լավ գիտենք Ավինյանի ու նրա մերձավոր շրջապատի՝ հասարակ ժողովրդի մասին ունեցած կարծիքի մասին՝ առհասարակ։ Այս ամենը հաշվի առնելով, ես համարում եմ, որ նրան այլեւս հարցեր տալու եւ պատասխաններ ակնկալելու իմաստ չկա։ Ինձ հետաքրքիր է՝ ի՞նչ կարծիք ունեք այս ամենի մասին Դուք՝ որպես ձեր քաղաքական թիմի ղեկավար եւ երբեմնի հեղափոխության առաջնորդ։ Դուք այս ողջ ընթացքում լուռ եք եղել։ Հիմա խնդրում եմ ներկայացրեք Ձեր դիրքորոշումը՝ ի՞նչ եք մտածում այս թանկացումների մասին», – նշել է Մարությանը։
Միասնական տոմսային համակարգի մասին
2025 թվականի հունվարի 1-ից Երևանում գործում է միասնական տոմսային համակարգ, ըստ որի՝ ուղետոմսերը կարժենան.
* 280 (300) դրամ՝ «90 րոպե» տոմսի համար (3 ուղևորության համար)
* 880 (900) դրամ - օրական փաթեթ (8 ուղևորության համար)
* 4800 (5000) դրամ՝ շաբաթական փաթեթի համար (30 ուղևորության համար)
* 8800 (9000) դրամ՝ ամսական փաթեթի համար (անսահմանափակ)
* 23,600 (24,000) դրամ՝ 90 օրվա համար (անսահմանափակ)
* 88,800 (90,000) դրամ՝ մեկ տարվա համար (365 օր, անսահմանափակ)
Առաջին թիվն առցանց տոմսի արժեքն է, իսկ փակագծերում՝ ֆիզիկական ուղետոմսի արժեքը։
Ցանկացած սակագնային փաթեթ գնելիս քաղաքացիները կկարողանան օգտվել բոլոր տեսակի հասարակական տրանսպորտից՝ ավտոբուսներից, մետրոյից, տրոլեյբուսներից։
Արտոնությունների մասին
2025 թվականի հունվարի 1-ից արտոնություններ են տրամադրվում մինչև 7 տարեկան երեխաներին (անվճար երթևեկություն), 8-ից 18 տարեկան դպրոցականներին (20% զեղչ), 8-18 տարեկան ծնողազուրկ դպրոցականներին (անվճար), 63 տարեկանից բարձր թոշակառուներին (30% զեղչ), Երևան քաղաքում սովորող ուսանողներին՝ անկախ գրանցման վայրից (15% զեղչ), մեկ ծնող կորցրած կամ ծնողազուրկ ուսանողներին (անվճար), 1-ին և 2-րդ կարգի հաշմանդամություն ունեցող անձինք (անվճար), մանկատների և տուն-ինտերնատների սաներին, պետությունից նպաստ և օգնություն ստացող անձանց համար (20% զեղչ), նախկին ԽՍՀՄ հերոսներին, Սոցիալիստական աշխատանքի, Հայաստանի ազգային հերոսներին, Փառքի շքանշանակիրներին (անվճար), 4 և ավելի երեխա ունեցող բազմազավակ ընտանիքների ծնողներին (անվճար):