Կամավոր ատեստավորում անցած ուսուցիչների աշխատավարձը կբարձրանա 30–50%–ով
ԵՐԵՎԱՆ, 21 հոկտեմբերի./Նովոստի–Արմենիա/. Հայաստանում ուսուցիչների աշխատավարձը, ովքեր կանցնեն կամավոր ատեստավորում, հոկտեմբերից կբարձրանա 30%, 40% կամ 50%–ով` կախված հավաքած միավորներից։ Այս մասին ասաց ՀՀ վարչապետ Նիկոլ Փաշինյանն այսօր կառավարության նիստի ժամանակ։
Նա նշեց, որ այս փուլում իրականացվում է մի քանի առարկաների ուսուցիչների կամավոր ատեստավորման ծրագիր։ Խոսքը հայոց լեզու և գրականություն, մաթեմատիկա, պատմություն, ֆիզիկա, քիմիա, կենսաբանություն առարկաների մասին է։ Նախատեսվում է ատեստավորում կազմակերպել բոլոր առարկաներից։
Փաշինյանը նշեց, որ երկրորդ փուլում ատեստավորումը կանցկացվի ավելի բարձր չափորոշիչներով։
«Այսինքն՝ այն ուսուցիչները, ովքեր կարողացել են իրենց աշխատավարձը 30, 40 կամ 50 տոկոսով բարձրացնել, նրանք հնարավորություն կունենան ևս մեկ անգամ արդեն իսկ բարձրացված աշխատավարձը կրկին ատեստավորման միջոցով բարձրացնել 30, 40 և 50 տոկոսով՝ վերահաստատելով իրենց բարձր որակավորումը։ Եվ այս գործընթացը կլինի բացարձակապես կամավոր», – ասաց վարչապետը։
Վարչապետը նշեց, որ 30%–ով կբարձրացվի այն ուսուցիչների աշխատավարձը, ովքեր կհավաքեն 70–80 միավոր, 40%–ով` 80–90 միավորի դեպքում, 50%–ով` 90–100 միավորի դեպքում։
ՀՀ ԿԳՄՍ նախարար Վահրամ Դումանյանն իր հերթին նշեց, որ առաջին փուլն արդեն ավարտվել է։ Սեպտեմբերի 26–ին անցկացվել է վերջին ատեստավորումը։
Նրա խոսքով, կամավոր ատեստավորման հայտ է ներկայացրել 1372 ուսուցիչ, որոնցից ատեստավորման է մասնակցել 996 մարդ (72,6%–ը)։
«Կամավոր ատեստավորում անցած 996 ուսուցիչներից 468–ը ստուգման արդյունքում ստացված միավորներով կստանան աշխատավարձի 30, 40 կամ 50%–ի բարձրացում։ Մեկ դրույքի համար ուսուցչի միջին աշխատավարձը կազմում է մոտ 125 հազար դրամ։ Այսպիսով, 30% բարձրացում ստացած ուսուցիչների աշխատավարձը կբարձրանա մոտ 37 հազար դրամով, 40%–ով բարձրացման դեպքում` 50 հազար դրամով, 50%–ով բարձրացման դեպքում` 61,5 հազար դրամով», – նշեց նա։
Նախարարն ընդգծեց, որ ատեստավորումն անցկացվել է սեպտեմբերի 18–ին, 19–ին, 25–ին և 26–ին, ատեստավորմանը մասնակցել են 7–12 դասարանների ուսուցիչները 7 առարկաներից` հայոց լեզու և գրականություն, հայոց պատմություն, հանրահաշիվ, երկրաչափություն, ֆիզիկա, քիմիա, կենսաբանություն, աշխարհագրություն։ Նրա խոսքով հաջորդ տարվանից այդ գործընթացին կմասնակցեն 5–12–րդ դասարանների բոլոր առարկաների ուսուցիչները։–0–
