Հայտնի է Fly Arna ազգային ավիափոխադրողի չվերթերի մեկնարկի ժամկետը
ԵՐԵՎԱՆ, 3 դեկտեմբերի․/Նովոստի-Արմենիա/․ Հայկական ազգային ավիափոխադրողը՝ Fly Arna-ն, կսկսի չվերթեր իրականացնել 2022թ․-ի ապրիլ-մայիսին։ Այս մասին հայտնեց Հայաստանի պետական հետաքրքրությունների ֆոնդի (ԱՆԻՖ) տնօրեն Դավիթ Փափազյանն այսօր կազմակերպված առցանց ասուլիսի ժամանակ։
Դավիթ Փափազյանի խոսքով` յուրաքանչյուր խոշոր ներդրումային ծրագիր ենթադրում է ամիսների, երբեմն տարիների աշխատանք, մինչ դա տեսանելի կլինի հանրությանը։
2021թ. հուլիսին հայտարարվեց այդպիսի ծրագրերից մեկի՝ «Էյր Արաբիա»-ի հետ համատեղ ազգային ավիափոխադրող ստեղծելու մասին, որն անվանվել է «Fly Arna» («Ֆլայ Արնա»):
«Ապրիլ-մայիս ամիսներին «Fly Arna»-ն արդեն կսկսի գործել: Այսինքն այդ ամիսներին արդեն կանոնավոր չվերթեր կիրականացվեն շուրջ 4 ուղղություններով: Եվ ծրագրի շրջանակներում նախատեսվում է ընդլայնել թե´ չթերթերի ուղղությունները, թե´ օդանավակայանների քանակը», - ասաց Փափազյանը:
Նրա խոսքով՝ Հայաստանի պետական հետաքրքրությունների ֆոնդի նպատակն է ընդլայնել օտարերկրյա ներդրումների ներգրավումն ու կապիտալի ներդրումը Հայաստանի տնտեսության մեջ, ինչպես նաև հետևողական լինել այդ գործընթացների ճիշտ ժամանակին իրականացմանը:
«Մենք եկել ենք այն եզրակացությանը, որ ամենաբաց և տնտեսական մրցակցությանը չխափանող կամ վտանգ չհանդիսացող ալգորիթմն այն է, որ մենք գումար ներդնենք։ Միաժամանակ ուզում ենք, որ պետական հետաքրքրվածությունն էլ ներկայացված լինի կապիտալով», - նշեց Փափազյանը:
Հիշեցնենք, որ Հայաստանի պետական հետաքրքրությունների ֆոնդը (այսուհետ՝ ԱՆԻՖ) և Մերձավոր Արևելքի ու Հյուսիսային Աֆրիկայի առաջին և ամենամեծ բյուջետային ավիափոխադրող՝ Էյր Արաբիան, հուլիսին հայտարարել էին հայկական նոր ազգային ավիաընկերության ստեղծման վերաբերյալ համաձայնագիր ստորագրելու մասին:
Ըստ համաձայնագրի՝ ավիաընկերության բազան պետք է հանդիսանա Երևանի «Զվարթնոց» միջազգային օդանավակայանը։
ԱՆԻՖ-ի մասին
ԱՆԻՖ-ը հիմնադրվել է 2019թ․-ին` օտարերկրյա ներդրումների ներգրավման, արտահանման աճի խթանման և Հայաստանում լայնածավալ նախագծերում ներդրումները համաֆինանսավորելու մանդատով։ ԱՆԻՖ-ի գործունեությունը միտված է օտարերկրյա ներդրումների ներգրավմանը, Հայաստանում ռազմավարական կարևորության ակտիվների պորտֆելի կառավարմանը։ ԱՆԻՖ֊ի համար առաջնահերթ ոլորտներն են` էներգետիկ ոլորտը, մետաղները և հանքարդյունաբերությունը, գյուղատնտեսությունը, լոգիստիկան և ենթակառուցվածքները, ֆինանսական ծառայությունները, առողջապահությունը, ՏՏ-ն, արդյունաբերությունը, սպառողական ապրանքները և տուրիզմը։ ԱՆԻՖ-ը համատեղ ներդրումներ է իրականացնում փորձառու գործընկերների, մասնագետ օպերատորների հետ: Երկրի ներսում ԱՆԻՖ֊ը տրամադրում է ծրագրերի ֆինանսավորում նոր և արդեն իսկ գործող ընկերություններին (www.anif.am):-0-
