ԵՐԵՎԱՆ, 2 նոյեմբերի./Նովոստի–Արմենիա/. Երևանի քաղաքապետարանի մամուլի քարտուղար Հակոբ Կարապետյանը նախօրեին երեկոյան տեղեկացրել է, որ Կենդանաբանական այգու աշխատակիցներն ու ներգրավված մասնագիտական ուժերը վնասազերծում են այգու հարակից տարածքներում թափառող շներին։
«Ընդ որում «վնասազերծում են» ասածը նշանակում է «թմրեցնում են»», – նշել է Կարապետյանն` ավելացնելով, որ կենդանիները համապատասխան հիմնարկում կենթարկվեն փորձաքննության։
Նրա խոսքով, զուգահեռաբար, իրավապահ մարմինները զբաղվում են վերջին երկու օրերի միջադեպերի քննությամբ։
Հիշեցնենք, որ վերջին երկու օրը թափառող շները հարձակվում են Կենդանաբանական այգու կենդանիների վրա։ Մասնավորապես, նոյեմբերի 1-ի լույս առավոտ ժամը 06:00-ի սահմաններում թափառող շների ոհմակը հարձակվել է Այգու 3 մուֆլոնների (2 արու, 1 էգ) վրա, ինչի հետևանքով գրանցվել է կենդանիների անկում: Միաժամանակ, հոկտեմբերի 31–ի լույս առավոտյան ժամը 05:00-ի սահմաններում այգու տարածք էր ներթափանցել թվով 5-6 թափառող շներից բաղկացած ոհմակ։ Ոհմակի հարձակման հետևանքով գրանցվել է այգում պահվող թվով 3 (երեք) կարմրավիզ կենգուրուների անկում։ Նախօրեին հայտնի դարձավ, որ Երևանի կենդանաբանական այգու տնօրեն Ռուբեն Խաչատրյանը հայտարարեց տնօրենի լիազորությունները դադարեցնելու մասին։ Տնօրենի հրաժարականը պայմանավորված է մասնավորապես Այգում պահվող կենդանիների վրա թափառող շների հարձակումներով։ Ավելի վաղ Երևանի փոխքաղաքապետ Տիգրան Վիրաբյանը, հաշվի առնելով վերջին շրջանում Երևանի կենդանաբանական այգու կառավարման հարցերում պարբերական դարձած խնդիրները, մասնավորապես, վերջին օրերի միջադեպերը, խորհրդակցելով քաղաքապետ Հայկ Մարությանի հետ, առաջարկել էր Երևանի կենդանակաբանական այգու տնօրենին պաշտոնից հեռանալու դիմում գրել։–0–
