ԵՐԵՎԱՆ, 25 սեպտեմբերի./Նովոստի–Արմենիա/. «Գազպրոմ Արմենիա» ՓԲԸ–ի վարչական շենքի զինված «գրավումով» մեկնարկեց ԱՊՀ մասնակից պետությունների իրավասու մարմինների «Արարատ-Անտիտեռոր-2019» համատեղ հակաահաբեկչական վարժանքի ուժային փուլը։
Սեպտեմբերի 25–26–ը Հայաստանում անցկացվում են ԱՊՀ մասնակից պետությունների իրավասու մարմինների «Արարատ-Անտիտեռոր-2019» համատեղ հակաահաբեկչական վարժանքի երկրորդ և երրորդ փուլերը։
Վարժանքի երկրորդ փուլի շրջանակում «պայթեցվել է» նաև գազատար Տավուշի մարզի Կողբ գյուղում, իրականացվել է զինված «գրավում» Աբովյանի գազի ստորգետնյա պահեստ-կայանում և պետական հեռուստաընկերության եթերի տաղավարում։
Հակաահաբեկչական օպերացիայի ընթացքում կազմակերպվել է գրոհ վարչական շենքում, որի ընթացքում օգտագործվել է հատուկ տեխնիկա և զրահապատ հետախուզադետքային մեքենա։ Հատուկ օպերացիայի ընթացքում ձերբակալվել է երեք «ահաբեկիչ», մեկը` ոչնչացվել։ Գրոհ կազմակերպած անձնակազմը կորուստներ չի կրել։
Վարժանքները կշարունակվեն սեպտեմբերի 26-ին ՀՀ զինված ուժերի «Բաղրամյան» զորավարժարանում, որտեղ անցկացվելու է վարժանքի եզրափակիչ փուլը՝ սահմանապահ գոտում ահաբեկչական ուղղվածության ապօրինի զինված կազմավորումների շրջափակմանը և ոչնչացմանը, բնակավայրը գրաված պայմանական ահաբեկիչների խմբի ոչնչացմանն ուղղված՝ Հայաստանի Հանրապետության զինված ուժերի, ոստիկանության և ԱԱԾ սահմանապահ զորքերի համատեղ հատուկ գործողությունը: ԱԻՆ ստորաբաժանումները կցուցադրեն ահաբեկչական գործողության հետևանքների նվազեցմանն ուղղված գործողություններ: -0-