Աշխատանքային օրենսգրքում չկա որևէ դրույթ, համաձայն որի, անձը չթեստավորվելու կամ չպատվաստվելու դեպքում պետք է ազատվի աշխատանքից. փաստաբանը՝ COVID-19-ի դեմ պատվաստումների հարկադրանքի մասին

ԵՐԵՎԱՆ, 14 սեպտեմբերի./Նովոստի–Արմենիա/.  Հոկտեմբերի 1-ից, երբ գործատուները պահանջեն պարտադիր պատվաստվել կամ 14 օրը մեկ ՊՇՌ թեստ հանձնել կառաջանա մասսայական գործազրկության և աշխատանքից հեռացման վտանգ, ասաց փաստաբան Սուսաննա Սարգսյանը:

Նշենք, որ հոկտեմբերի 1–ից Հայաստանում ներդրվում է պահանջ, ըստ որի` աշխատողները պետք է 14 օրը մեկ գործատուին ներկայացնեն ՊՇՌ թեստի արդյունքը, կամ պատվաստվեն, հակառակ դեպքում գործատուն կտուգանվի, նա նաև իրավունքի ունի աշխատանքից ազատել աշխատողին։

Սարգսյանի խոսքով՝  կորոնովիրուսի դեմ պատվաստումների խնդիրն արդեն իսկ լուրջ սահմանադրական կոնվենցիաների և անձի աշխատանքային իրավունքի արգելք և խոչընդոտ է հանդիսանում:

«Աշխատանքային օրենսգրքում հստակ սահմանված է, թե որ դեպքերում գործատուն կարող է ազատել անձին աշխատանքից: Որևէ գործատու աշխատակցին չի կարող պարտադրել բժշկական հարկադրանքի միջոցների: Նման միջոցներ կարող է հարկադրել դատարանը, այն էլ հատուկ դեպքերում: Իսկ ինչ-որ մի նախարարի անհեռատես, չհիմնավորված օրենքի խախտումներով, տարբեր իրավական խախտումներով անձը չի կարող ենթարկվել բժշկական հարկադրանքի կամ բժշկակական միջամտության», - ասաց Սարգսյանն այսօր կայացած ասուլիսի ժամանակ:

Փաստաբանի խոսքով՝ սա չստուգված մեթոդ է, և որևէ կերպ արդարացված չէ: Եվ, եթե անձը չի ցանկանում պատվաստվել կամ ՊՇՌ թեստ հանձնել, գործատուն, ուղղակի որևէ կերպ չի կարող նրան ազատել աշխատանքից:

Նրա պնդմամբ, աշխատանքային օրենսգրքում չկա որևէ դրույթ, համաձայն որի, անձը չթեստավորվելու կամ չպատվաստվելու դեպքում, պետք է ազատվի աշխատանքից: Այն գործատուները, ովքեր ցանկություն կունենան կանգնելու իրենց աշխատակիցների կողքին, սակայն մտավախություն կունենան, որ կարող են տուգանվել, Սուսաննա Սարգսյաննը նշեց, որ աշխատանքային օրենսգրքում նման կետ ևս չկա:

«Առողջապահության նախարարությունը չի կարող ստեղծել այնպիսի մարմին, որը միտված կլինի իրավունքի և օրենքի հիման վրա, և կկարողանա բոլոր կազմակերպություններում ստուգումներ իրականացնել: Որովհետև օրենսգիրքը հստակ  սահմանում է, որ իրավաբանական անձի մոտ ստուգումներ կարող է անցկացնել համապատասխան ոլորտի մասնագետը»,-ասաց փաստաբանը: