ԵՐԵՎԱՆ, 30 մայիսի./Նովոստի- Արմենիա/. Կառավարության կառուցվածքային փոփոխություններով պայմանավորված՝ վերակազմակերպվող նախարարություններում սկսվել է փոփոխությունների և վերանշանակումների գործընթացը: Այս մասին հայտնում է կառավարության մամուլի ծառայությունը։
«Դրա շրջանակում վերակազմակերպվող նախարարություններում նախարարների տեղակալներն ազատվել են զբաղեցրած պաշտոններից»,– ասվում է հաղորդագրության մեջ։
Կառավարության մամուլի ծառայությունից հայտնում են, որ այս գործընթացին կհաջորդեն համապատասխան նշանակումները:
Հայաստանի Ազգային ժողովը մայիսի 8-ին երկրորդ և վերջնական ընթերցմամբ ընդունեց «Կառավարության կառուցվածքի մասին» օրենքում փոփոխություններ և լրացումներ կատարելու մասին օրինագիծը: Կառավարության ներկայացված փոփոխությունների օգտին քվեարկել է միայն «Իմ քայլը» խմբակցությունը:
Ըստ օրինագծի, Հայաստանում նախարարությունների թիվը կկրճատվի մինչև 12: Կվերացվի նաև առաջին փոխվարչապետի ինստիտուտը, իսկ փոխվարչապետների թիվը կկարճատվի մինչև 2-ի:
Օպտիմալացման արդյունքում մշակույթի ու սպորտի և երիտասարդության հարցերով նախարարությունները կմիաձուլվեն կրթության և գիտության նախարարության հետ, որը կկոչվի գիտության, կրթության, մշակույթի և սպորտի նախարարություն:
Բացի այդ, գյուղատնտեսության ու տնտեսական զարգացման և ներդրումների նախարարությունները կմիացվեն էկոնոմիկայի նախարարության կազմում: Էներգետիկ ենթակառուցվածքների և բնական պաշարների նախարարությունը և տարածքային կառավարման և զարգացման նախարարությունը կմիացվեն` ստեղծելով տարածքային կառավարման և ենթակառուցվածքի նախարարություն, որի իրավասության տակ կլինի ամբողջ տրանսպորտային համակարգը, ինչպես նաև ճանապարհային ենթակառուցվածքի հարցերը:
Տրանսպորտի, կապի և տեղեկատվական տեխնոլոգիաների նախարարությունը կվերանվանվի և կստանա թվայնացման և ռազմական արդյունաբերության հետ կապված լիազորություններ: Սփյուռքի նախարարությունը կմիացվի վարչապետի աշխատակազմին և կստեղծվի Սփյուռքի հարցերով գլխավոր հանձնակատարի ինստիտուտը:
Պաշտոններից ազատված պաշտոնատար անձանց ցանկը ներկայացված է Հայաստանի էլեկտրոնային կառավարության կայքում։
Դավիթ Սարգսյանը և Բաբկեն Տեր–Գրիգորյանն ազատվել են սփյուռքի փոխնախարարների պաշտոնից։
Քրիստինե Ասատրյանը, Սարգիս Ավագյանը, Գևորգ Լորեցյանը և Գաբրիել Ղազարյանն ազատվել են սպորտի և երիտասարդության հարցերի փոխնախարարների պաշտոնից։
Տիգրան Գալստյանը և Նազենի Ղարիբյանն ազատվել են մշակույթի փոխնախարարների պաշտոնից։
Վարդան Գևորգյանը և Հակոբ Վարդանյանն ազատվել են էներգետիկ ենթակառուցվածքների և բնական պաշարների փոխնախարարների պաշտոնից։
Տիգրան Գաբրիելյանը, Արտակ Քամալյանը և Գառնիկ Պետրոսյանն ազատվել են գյուղատնտեսության փոխնախարարների պաշտոնից։
Արևիկ Անապիոսյանը, Գրիշա Թամրազյանը և Լուսինե Առաքելյանն ազատվել են կրթության և գիտության փոխնախարարների պաշտոնից։
Գեղամ Վարդանյանը, Բագրատ Բադալյանը և Արմեն Արզումանյանն ազատվել են տրանսպորտի, կապի և տեղեկատվական տեխնոլոգիաների փոխնախարարների պաշտոնից։
Ալբերտ Բաբայանը, Ավագ Ավանեսյանը և Մանե Ադամյանն ազատվել են տնտեսական զարգացման և ներդրումների փոխնախարարների պաշտոնից։
Վաչե Տերտերյանն ազատվել է տարածքային կառավարման և զարգացման առաջին փոխնախարարի պաշտոնից, իսկ Կարեն Իսախանյանը և Լիլիա Շուշանյանն ազատվել են նույն գերատեսչության փոխնախարարների պաշտոնից։
Իրինա Ղափլանյանն ազատվել է բնապահպանության առաջին փոխնախարարի պաշտոնից։ -0-
Ծանոթացեք լուրերին առաջինն ու քննարկեք դրանք մեր Telegram-յան ալիքում