Հափշտակվել է շուրջ 2․64 մլն դրամ. կոռուպցիոն դեպք է բացահայտվել Գյումրու հիվանդանոցում (ՎԻԴԵՈ)

ԵՐԵՎԱՆ, 25 հուլիսի./Նովոստի–Արմենիա/. Ոստիկանությունը կոռուպցիոն բնույթի հանցագործություն է բացահայտել վերաբերյալ ԱԱԾ-ի օպերատիվ տեղեկությունների հիման վրա։

Ինչպես հայտնում է ոստիկանության մամուլի ծառայությունը,  ոստիկանության Շիրակի մարզային վարչության և Մուշի բաժնի ծառայողների հետ համատեղ օպերատիվ-հետախուզական միջոցառման արդյունքում պարզվել է, որ «Գյումրու ինֆեկցիոն-հակատուբերկուլյոզային հիվանդանոց» ՓԲԸ-ի տնօրենը, 2011-2018 թվականների ընթացքում ՀՀ Առողջապահության նախարարության հետ ամեն տարի կնքել է պետության կողմից երաշխավորված անվճար և արտոնյալ պայմաններով ծառայությունների մատուցման պայմանագրեր։

Որպես սանիտար և բուժքույր աշխատելու համար տնօրենը աշխատանքային պայմանագրեր է կնքել երկու կնոջ հետ, որպես էլեկտրիկ՝ համատեղության կարգով նաև բանվոր, դռնապահ և վարորդ է աշխատանքի ընդունել նաև մի տղամարդու։

Տարբեր ամիսների կանայք բացակայել են Հայաստանից, իսկ տղամարդը որպես վարորդ, դռնապահ ու բանվոր չի աշխատել։

«Տնօրենը համապատասխան տեղեկագրերում նրանց հաճախելիության վերաբերյալ կեղծ տվյալներ է նշել, կազմել կեղծ հաշվետվություններ, դրանք ներկայացրել է ՀՀ առողջապահության նախարարություն ու ֆինանսավորում ստացել»,– նշվում է հաղորդագրությունում։ 

Արդյունքում խաբեությամբ հափշտակվել է շուրջ 2․640․000 դրամ։

Փաստի առթիվ հարուցվել է քրեական գործ՝ ՀՀ քրեական օրենսգրքի համապատասխան հոդվածների հատկանիշներով։

Կատարվում է նախաքննություն։ -0-