Վանեցյանը հայտնեց, թե ինչպես է պատրաստվում պայքարել ֆեյքերի դեմ

ԵՐԵՎԱՆ, 4 ապրիլի. /Նովոստի-Արմենիա/. Ազգային անվտանգության ծառայության տնօրեն Արթուր Վանեցյանը հինգշաբթի կառավարության նիստից հետո լրագրողների հետ զրույցում հայտնեց, թե ինչպես է պատրաստվում կատարել վարչապետ Նիկոլ Փաինյանի հանձնարարությունը` պայքարել ֆեյքերի դեմ:

Այսօր ավելի վաղ Փաշինյանը նիստի ընթացքում հայտարարել է, որ եթե որոշ հանցավոր շրջանակներ միլիոններ են ծախսում սոցիալական ցանցերում, լրատվամիջոցներում հասարակական կարծիքի մանիպուլյացիաներ անելու համար, դա ազգային անվտանգության խնդիր է, և նա հույս ունի, որ ԱԱԾ–ն կկարողանա այս հարցում ապահովել կոնկրետ արդյունքներ։

«Այսպես կոչված ֆեյքերի հետ պայքարը պետք է լինի շատ զգույշ, մտածված: Եթե հրապարակման մեջ, որը արել է ֆեյքը կամ սովորական անձը, չկա հանցակազմ, ապա իրավապահ մարմիններն առիթ չեն ունենա ինչ-որ գործողություններ անել: Եթե կա, ապա ԱԱԾ-ն և մնացած իրավաահ մարմինները պարտավոր են արձագանքել և իրականացնել համապատասխան միջոցառումներ, որպեսզի կանխեն հանցագործությունը», - ասաց նա:

Հարցին, թե ինչ են ի նկատի ունենալու «մանիպուլյացիա» հասկացության տակ`Վանեցյանն ասաց, որ դա սոցկայքերում անանուն կամ անհայտ օգտատերերի կողմից արված հայտարարությունները, հրապարակումները կամ թեմաներն են, որոնք նպատակ ունեն ձևավորել այնպիսի տրամադրություն, որը կարող է հանգեցնել որոշակի հետևանքների:

«Չեմ ուզում բառախաղի մեջ մտնել, սակայն հավաստիացնում եմ, որ այդ գործընթացն իրականացվելու է շատ զգույշ, և ոչ մի դեպքում չի խախտվի խոսքի ազատությունը», - ասաց նա:

ԱԱԾ տնօրենը խնդրեց մի փոքր ժամանակ տրամադրել, որպեսզի հնարավոր լինի կողմնորոշվել, թե ինչ մեթոդներով է իրականացվելու այդ պայքարը։–0–