Հայ ուսանողները կունենան սեփական տոնը

ԵՐԵՎԱՆ, 8 դեկտեմբերի./Նովոստի–Արմենիա/. ՀՀ ԱԺ–ն երեքշաբթի նիստի ժամանակ առաջին ընթերցմամբ ընդունել է «Տոների և հիշատակի օրերի մասին» օրենքում նախատեսված լրացումները, որոնցով նախատեսվում է ներդնել նոր տոն` Երիտասարդության և ուսանողության օրը։

Ինչպես նշեց ՀՀ ԿԳ նախարար Արմեն Աշոտյանը, կառավարությունն ուսումնասիրել է Ուսանողության օրվա համար ամսաթվի ընտրության երեք նմանատիպ առաջարկներ։ Ուսանողության օրը միջազգային օրացույցով  ավանդաբար նշվում է նոյեմբերի 17–ին։

«Մենք որոշեցինք, որ տոնի ակունքները պետք է ունենան ազգային հիմքեր և Երիտասարդության և ուսանողության օրվա համար ընտրեցինք Երևանի պետական համալսարանի հիմնադրման օրը` մայիսի 26–ը», – ասաց Աշոտյանը։

Նա նշեց, որ կառավարության կարծիքով` մայիսի 26–ը խորհրդանշական է  և կարևոր ոչ միայն ԵՊՀ–ի ուսանողների, այլ նաև ողջ համակարգի համար` որպես կրթության հայկական համակարգի կազմավորման օր։