ԵՐԵՎԱՆ, 18 հունվարի. /Նովոստի-Արմենիա/. ՀՀ առողջապահության նախարարությունը պարզաբանում է ներկայացրել մանկապարտեզների և դպրոցների աշխատանքի հնարավոր դադարեցման վերաբերյալ։
Վերջերս ՍՇՎ-ի և գրիպի սեզոնային սրացման կապակցությամբ տեղեկատվություն հայտնվեց այն մասին, որ հանրակրթական հաստատությունները ժամանակավորապես կփակվեն:
«Համացանցում ակտիվ կեղծ տեղեկատվություն է տարածվում, թե իբր հրահանգվել է դպրոցների և մանկապարտեզների աշխատանքները դադարեցնել 10 օրով: Պաշտոնապես հայտարարում ենք, որ այդ տեղեկատվությունը չի համապատասխանում իրականությանը», - այդ մասին Facebook-ի իր էջում գրել է ՀՀ առոջջապահության նախարարության մամուլի քարտուղար Ալինա Նիկողոսյանը:
Սուր շնչառական վարակների իրավիճակը հանրապետությունում կայունանում է: Հունվարի 17-ի դրությամբ պոլիկլինիկական կազմակերպություններում գրանցվել է 1251 դիմելիություն, հունվարի 15-ին՝ 2065:
Հանրապետության հիվանդանոցներում հոսպիտալացված է սուր շնչառական վարակներով 775 հիվանդ, հունվարի 15-ին՝ 837: Դեպքերի 95%-ն արձանագրվել է երեխաների շրջանում (հատկապես՝ 0-2 տարեկան):
Ինչ վերաբերում է սուր շնչառական վարակներով պայմանավորված շտապօգնության կանչերին, ապա արձանագրվել է 107 կանչ, հունվարի 15-ի՝ 121-ի դիմաց:-0-