ԵՐԵՎԱՆ, 18 հուլիսի. /Նովոստի-Արմենիա/. Ստեղծված իրավիճակում հաղթանակներից խոսելն ամենամեծ անմտությունն է, հայտարարել է քաղաքագետ Հրանտ Մելիք-Շահնազարյանը` մեկնաբանելով Երևանում ՊՊԾ գնդի շենքը զինված խմբավորման կողմից զավթումը:
Կիրակի լուսադեմին մի խումբ զինված անձինք մուտք են գործել ՀՀ ոստիկանության պարեկապահակային ծառայության գնդի տարածք և բռնության սպառնալիքով պահում են այնտեղ գտնվող անձանց, որոնց թվում են` ՀՀ փոխոստիկանապետ Վարդան Եղիազարյանն ու Երևանի փոխոստիկանապետ Վալերի Օսիպյանը, ովքեր գնացել են այնտեղ բանակցություններ վարելու համար։
Հարձակման ժամանակ զոհվել է գնդապետ Արթուր Վանոյանը, չորս ոստիկան վիրավորվել է։
«Չի լինելու հաղթանակ ո՛չ ՊՊԾ գնդում ամրացած զինյալների, ո՛չ ոստիկանության, ո՛չ իշխանությունների և ո՛չ էլ ժողովրդի համար», - գրել է նա Facebook սոցիալական ցանցի իր էջում։
Աբովյան. բոլորը պարտվեցին>>
«Զենք է բարձրացվել, մարդ է սպանվել. ի՞նչ հաղթանակի մասին է կարելի մտածել այս պարագայում։ Կամ թե ի՞նչ ակնկալիք կարող են ունենալ հրապարակ դուրս եկողները։ Առավել ևս՝ նման կոչերով հանդես եկողները», - ըննդգծել է Մելիք-Շահնազարյանը։
Նրա խոսքով, Հայաստանում հիմա մի կոչ է ակտուալ։
«Այն պիտի ուղղված լինի զինյալներին և պետք է զենքը վայր դնելու հորդոր պարունակի։ Ուրիշ ոչինչ։ Այլ բաներ մի պահանջեք էտ մարդկանցից։ Մի՛ դրդեք նրանց ավելի մեծ հանցանքի։ Նոր մեղքի տակ մի գցեք։ Եթե բոլորի ուզածն օրենքի գերակայությունն ու օրինական պետությունն է, ուրեմն այս ցնցումն էլ պետք է օրենքի դաշտում հարթվի։ Մնացած բոլոր սցենարներն անընդունելի ու կործանարար են», - հայտարարել է քաղաքագետը։
Նա կոչ է արել հասկանալ, որ հաղթող կողմ չի լինելու։
«Բոլորս ենք հաղթելու եթե, գնանք օրինական ուղղով և/կամ պարտվելու, եթե ընտրենք ուժով հարց լուծելու ճանապարհը», - ասել է Մելիք-Շահնազարյանը։
Զինված անձինք «Հիմնադիր խորհրդարան» արմատական ընդդիմադիր կազմակերպության կալանավորված առաջնորդ Ժիրայր Սեֆիլյանի կողմնակիցներն են, ովքեր պահանջում են ազատել նրան։ -0-