ԵՐԵՎԱՆ, 20 հուլիսի. /Նովոստի–Արմենիա/. ՀՀ անձնագրերի վավերականության ժամկետն այլևս չի երկարացվի, հինգշաբթի կառավարության նիստում ասաց ՀՀ ոստիկանապետի տեղակալ Վարդան Եղիազարյանը։
Մինչ օրս Հայաստանում հին նմուշի անձնագրերը տրվում էին 10 տարով, ինչից հետո հնարավորություն էր ընձեռվում երկարացնել դրանք ևս 5 տարով։
Загружается новость ... "Лево"
«Օրենքի համաձայն և հաշվի առնելով ICAO–ի պահանջները` Հայաստանում նախատեսված չէ բիոմետրիկ անձնագրերի վավերականության ժամկետի երկարացում, ինչը, սակայն, չի վերաբերում հին նմուշի անձնագրերին», – ասաց Եղիազարյանը։
Նա նշեց, որ կառավարության այս որոշման համաձայն` այսուհետ հին նմուշի անձնագրերը հնարավոր չի լինի երկարացնել 5 տարով։
Նրա խոսքով, այս որոշմամբ կառավարությունը հավասարեցնում է օրենքի կիրառումը բիոմետրիկ և հին նմուշի անձնագրերի նկատմամբ։
«Շատ երկրներ, հատկապես ԱՄՆ–ն և Շենգեն գոտու երկրները մուտքի վիզաներ չեն տրամադրում վավերականության ժամկետը երկարացրած անձնագրերով կամ ընդհանրապես արգելում են երկիր մուտք գործել այն անձանց, ովքեր ունեն նման անձնագրեր, ինչը որոշակի անհարմարություն է առաջացնում ՀՀ քաղաքացիների շրջանում», – ասաց Եղիազարյանը։
Նրա խոսքով, 10 տարով տրամադրված անձնագրերը, ևս հինգ տարով երկարացվելու դեպքում, խոչընդոտներ են առաջացնում անձի նույնականացման հետ։
«Բոլոր փոփոխությունները թույլ կտան ՀՀ քաղաքացիներին խուսափել խնդիրներից արտերկիր մեկնելիս և հեշտացնել նույնականացման ընթացակարգերը», – ասաց Եղիազարյանը։–0–
