ԵՐԵՎԱՆ, 14 մարտի. /Նովոստի–Արմենիա/. Մարտի 18–ին ՀՀ ԱԺ–ում կմեկնարկեն Ընտրական օրենսգրքի քննարկումները, երկուշաբթի ԱԺ նիստի ընթացքում ասաց փոխխոսնակ Էդուարդ Շարմազանովը։
Նրա խոսքով` քննարկումները կանցկացվեն ՀՀ ԱԺ պետաիրավական հարցերի մշտական հանձնաժողովի շրջանակում։ Քննարկումներին կմասնակցեն խորհրդարանական բոլոր խմբակցությունների ներկայացուցիչները։
«Մեր նպատակը ֆորմալ քննարկումը չէ, մենք ցանկանում ենք մեր գործընկերների հետ միասին հասնել նոր Ընտրական օրենսգրքի ընդունման, որը կբարձրացնի ընտրական գործընթացների նկատմամբ հասարակության վստահության մակարդակը», – ասաց Շարմազանովը։
Նա նաև նշեց, որ խորհրդարանական քննարկումներից հետո կկազմակերպվեն լայնամասշտաբ լսումներ, որոնց արդյունքում օրենսգիրքը կներկայացվի խորհրդարանի քննարկմանը։ «Մենք բաց ենք երկխոսության համար և պատրաստ ցանկացած ձևաչափի քննարկման», – ասաց Շարմազանովը։
Ընդդիմադիր ՀԱԿ խմբակցության ղեկավար Լևոն Զուրաբյանն իր հերթին առաջարկեց ձևավորել աշխատանքային խումբ` հաշվի առնելով այն, որ ապրիլի 2–ից Ընտրական օրենսգրքի նախագիծը կներկայացվի խորհրդարանի քննարկմանը։
«Առաջարկում ենք ստեղծել «4+4+4» ձևաչափի քաղաքական երկխոսություն, որտեղ ներկայացված կլինեն չորսական ներկայացուցիչներ` իշխանությունից, ընդդիմությունից և քաղաքացիական հասարակությունից», – ասաց Զուրաբյանը։
ՀՀԿ խմբակցության ղեկավար Վահրամ Բաղդասարյանն իր հերթին նշեց, որ ՀՀԿ–ն դեմ չէ քննարկումներին ներգրավել բոլոր քաղաքական ուժերին` ընդգծելով, որ քննարկումների արդյունքում կստեղծվի աշխատանքային խումբ, որն առաջարկներ կհավաքի։
«Պատրաստ ենք ցանկացած ձևարափով քննարկել Ընտրական օրենսգրքի փոփոխությունները, սակայն ուզում եմ նշել, որ մարտի 22–ին նախատեսվում է կազմակերպել լայնամասշտաբ քննարկում արտախորհրդարանական ուժերի, հասարակական և միջազգային կառույցների հետ», – ասաց Բաղդասարյանը։
Նոր Ընտրական օրենսգրքի ընդունման անհրաժեշտությունը պայմանավորված է սահմանադրական փոփոխություններով և անցումով իշխանավարման խորհրդարանական ձևին։ –0–
