ԵՐԵՎԱՆ, 20 ապրիլի. /Նովոստի–Արմենիա/. Գյումրիի ռուսական 102–րդ ռազմակայանի պայմանագրային զինծառայող Դմիտրի Լոշմանովը մի քանի օր եղել է մերկապարուհու տանը։
Ինչպես հաղորդել էինք ավելի վաղ, ապրիլի 18–ի երեկոյան հայտնի դարձավ, որ Դմիտրի Լոշմանովը ապրիլի 16–ին դուրս է եկել հանրակացարանից, գնացել գնումների և չի վերադարձել։ Միաժամանակ ՌԴ ՊՆ–ն հաստատեց ռուս զինծառայողի կորուստը։ ՀՀ ոստիկանությունն իր հերթին հետախուզում հայտարարեց Լոշմանովի նկատմամբ։ Իրականացվեցին որոնողական աշխատանքներ։
Ապրիլի 19–ի երեկոյան հայտնի դարձավ, որ Լոշմանովը գտնվել է Գյումրու «Մուշ» թաղամասի բնակարաններից մեկում և բերման է ենթարկվել Գյումրու ոստիկանության «Մուշ» բաժանմունք:
Armtimes.com-ի հաղորդմամբ, ապրիլի 16-ին Դմիտրի Լոշմանովը ստացել է աշխատավարձ և ընկերների հետ զվարճանալու նպատակով գնացել է Գյումրու «Լաքի» գիշերային ակումբ:
Ինչպես armtimes.com-ի աղբյուրներն են տեղեկացնում, Լոշմանովը գիշերային ակումբում «մի լավ խմել է», ծանոթացել և մտերմացել է մի քանի մերկապարուհիների հետ, որից հետո միասին գնացել են մերկապարուհու «Մուշ» թաղամասի բնակարան:
«Մի քանի օր այնտեղ մնալուց հետո, փողերը վերջացել են, իսկ այդ կինը ինչ-որ ձևով տեղեկացրել է ոստիկաններին, թե կորած զինվորը այստեղ է՝ եկեք, տարեք»,- պատմել է ոստիկանության աղբյուրը:
Լոշմանովին գտել են հայ իրավապահները:
Armtimes.com-ը, հղում անելով ՀՀ քննչական կոմիտեի նախագահի օգնական Սոնա Տռուզյանը, տեղեկացնում է նաև, որ այսօր առավոտյան Լոշմանովն ազատ է արձակվել Շիրակի մարզի քննչական վարչությունից:
«Նա համարվել է անհետ կորած: Գտել են, որից հետո վերցվել է բացատրություն, պարզվել է, որ այսքան ժամանակ գտնվել է ծանոթի տանը և հանձնվել է զորամասի հրամանատարությանը: Նա ողջ առողջ է», – նշել է Տռուզյանը:–0–
