«Ելքը» Երևանի քաղաքապետի թեկնածու չի առաջադրի և չի մասնակցի ավագանու արտահերթ նիստին. հայտարարություն
ԵՐԵՎԱՆ, 14 հուլիսի./Նովոստի–Արմենիա/. Երևանի Ավագանու «Ելք» խմբակցությունը հայտարարություն է տարածել Երևանի քաղաքապետի ընտրությունների կապակցությամբ։
Նշենք, որ հուլիսի 9–ին Երևանի քաղաքապետ Տարոն Մարգարյանը հրաժարական տվեց։ Քաղաքապետի արտահերթ ընտրությունները նշանակվել են հուլիսի 16–ին։
Ինչպես նշվում է «Ելքի» տարածած հայտարարության մեջ, դաշինքը կարևորում է Երևանի ավագանու ազատ, արդար և թափանցիկ ընտրությունները։
«Նկատի ունենալով, որ 2017 թվականին կայացած ավագանու ընտրությունները ուղեկցվել են բազմաթիվ խախտումներով և բռնություններով, անհրաժեշտ ենք համարում ներկայիս ավագանու արձակումը և առաջիկայում արտահերթ ընտրությունների անցկացումը։ Հետևաբար՝ հուլիսի 16-ին կայանալիք քաղաքապետի ընտրություններում Ելք խմբակցությունը թեկնածու չի առաջադրելու և չի մասնակցելու ավագանու արտահերթ նիստին», – նշվում է հայտարարության մեջ։
Մինչ այժմ քաղաքապետի պաշտոնական թեկնածու է գրանցել «Երկիր ծիրանին», որն առաջադրել է Զարուհի Փոստանջյանի թեկնածությունը։ Ավագանու անդամ ՀՀԿ–ն իր հերթին հայտարարել է, որ քաղաքապետի թեկնածու չի առաջադրելու։
Երևանի Ավագանու խորհրդում ներառված է երեք խմբակցություն։ ՀՀԿ–ին պատկանում է 46 մանդատ, «Ելք» խմբակցությանը` 14 մանդատ և «Երկիր ծիրանիին»` 3 մանդատ։–0–
