ԵԽԽՎ նախագահը քննարկելու է ԵԽԽՎ հայաստանյան պատվիրակության անդամ Նաիրա Զոհրաբյանի վարքը

ԵՐԵՎԱՆ, 17 փետրվարի. /Նովոստի–Արմենիա/.ԵԽԽՎ նախագահ Պեդրո Ագրամունդը նախօրեին «Հայկական ժամանակ» թերթի թղթակցին փոխանցել է, որ համապատասխան պահի շահագրգիռ անձանց հետ քննարկելու է ԵԽԽՎ հայաստանյան պատվիրակության անդամ Նաիրա Զոհրաբյանի վարքը ԵԽԽՎ ձմեռային նստաշրջանում։

ԵԽԽՎ-ում Թուրքիայի պատվիրակությունը բողոք է ներկայացրել ԵԽԽՎ Բյուրո Նաիրա Զոհրաբյանի պահվածքի հետ կապված։ Թուրքական կողմը բողոքել է, որ Զոհրաբյանը վիրավորել է Թուրքիայի մեջլիսի պատգամավոր Մարգար Եսայանին, որը կողմ էր քվեարկել Ուոլթերի «Բռնության աճը ԼՂ-ում և Ադրբեջանի մյուս գրավյալ տարածքներում» բանաձևին։

Զոհրաբյանի դեմ պատժամիջոցներ կիրառելու՞ եք ապրիլյան նստաշրջանում նրան ձայնի իրավունքից զրկելու վերաբերյալ թերթի թղթակցի հարցին ի պատասխան` ԵԽԽՎ նախագահը նշել է. «Միջադեպը ներկայացվել է իմ ուշադրությանը։ Ես պատրաստվում եմ նամակ գրել բոլոր ազգային պատվիրակությունների ղեկավարներին նրանց ուշադրությունը հրավիրելով պատշաճ վարքագիծ դրսևորելու անհրաժեշտության վրա մեր կանոններին եւ արժեքներին համապատասխան։ Ես պատրաստվում եմ քննարկել այս ցավալի միջադեպըծահագրգիռ անձանց հետ, համապատասխան պահի», գրում է թերթը։–0–