ԵՐԵՎԱՆ, 22 մայիսի./Նովոստի–Արմենիա/. «Այբ» կրթական հիմնադրամը պատասխանել է էլիտար դպրոցների մասին ԿԳ նախարար Արայիկ Հարությունյանի հայտարարությանը։
Մայիսի 20–ի իր ելույթում նախարարն անդրադարձել է կառավարության կողմից ֆինանսավորվող մի շարք ուսումնական նախագծերին` նշելով. «Էլիտար դպրոցներին ՀՀ ԿԳՆ-ն չի աջակցելու, տեր մեսրոպներին գումարներ չեն գնալու՝ 100-ավոր միլիոն դրամներ, որոնք գնում են մասնավոր դպրոցների»։
«Մի կողմ թողնելով հնչեցված ձևակերպման ընտրությունը՝ ուզում ենք հավատալ, որ այս հայտարարությունն արված է անբավարար կամ սխալ տեղեկատվության հետևանքով։
Որպես տեղեկանք՝ ցանկանում ենք նշել, որ եթե ակնարկում եք «Այբ» դպրոցին, ապա այն որևէ ձևաչափով երբևէ պետական ֆինանսավորում չի ստացել։ Այն շահույթ չհետապնդող կազմակերպություն է՝ հիմնադրամի կարգավիճակով։ «Այբ» դպրոցը կառուցվել է բացառապես հարյուրավոր բարերարների միջոցներով, իր գործունեության համար անհրաժեշտ ֆինանսական միջոցները հավաքում է բարերարների և ծնողների մասնակցությամբ», – նշվումէ դպրոցի մամուլի ծառայության հայտարարության մեջ։
Նշվում է, որ «Այբ» ավագ դպրոցի աշակերտների 70 տոկոսը չի վճարում կամ մասնակի է վճարում իր կրթության համար՝ բարերարների կուռ համայնքի աջակցությամբ։ «Այբ» ավագ դպրոցում դրա շնորհիվ կրթության հավասար հնարավորություն են ստանում բոլորը՝ անկախ վճարունակությունից և բնակության վայրից՝ Երևանից, մարզերից, Արցախից, սփյուռքից։ Ավելին, անհրաժեշտության դեպքում մարզերի և Արցախի աշակերտների կեցության հարցը նույնպես հոգում է դպրոցը։
Հայտարարության մեջ նաև նշվում է, որ Հայաստանն այսօր ունի ժամանակակից ամենաբարձր չափանիշներին համապատասխան հայալեզու կրթական ծրագիր, որը Քեմբրիջի համալսարանի Քեմբրիջի գնահատման և միջազգային կենտրոնի և Մեծ Բրիտանիայի ճանաչման և համեմատության ազգային գործակալության (UK NARIC) կողմից համազոր է ճանաչվել բրիտանական GCE A Level և ամերիկյան Advanced Placement խորացված մակարդակի դպրոցական որակավորումներին։
«Մենք հասկանում ենք, որ շատ դժվար է հավատալ, որ նման կոռումպացված միջավայրում կարող են լինել անհատներ և կառույցներ, որոնք գործում են ազնիվ, բաց և գաղափարին հավատարիմ մնալով։ Սակայն «Այբ»-ը՝ իր գործունեությամբ և գոյությամբ, այս մոտեցումների ապացույցն է», – նշվում է հայտարարության մեջ։
Հայտարարության մեջ նաև առաջարկվում է կազմակերպել հանդիպում նախարարի հետ` իր նախընտրած ձևաչափով։
«Մենք՝ որպես Հայաստանի լավագույն ապագան որակապես նոր կրթության հետ կապող կառույց, պատրաստ ենք Ձեզ հետ մասնագիտական շարունակական քննարկումների, ինչպես նաև փոխանցելու այն փորձը, որ կուտակել ենք ՀՀ կրթության ապագայի տեսլականի իրականացմանը մեր 12 տարվա ամենօրյա մասնակցությամբ», – նշվում է հայտարարության մեջ։
«Այբ» դպրոցը բացվել է 2011 թ.–ին «Այբ» կրթական հիմանդրամի կողմից հարյուրավոր բարերարների ֆինանսական աջակցությամբ։ «Այբ» ավագ դպրոցը Հայաստանի ոչ պետական սեկտորի առաջին սոցիալական նախագիծն է, և նրա աշակերտների մոտ 70%–ն ամեն տարի ստանում է կրթաթոշակ (ուսման ծախսերի փոխհատուցում)։ «Այբ» դպրոցն ունի կրթական 12–ամյա համակարգ` ուսման եռաստիճան ձևաչափով`տարրական (1-4-րդ դասարաններ), միջին (5-9-րդ դասարաններ) և ավագ (10-12-րդ դասարաններ) դպրոցներ։ –0–