«Բանանց» ֆուտբոլային ակումբն իսպանացի մարզիչ կգլխավորի

ԵՐԵՎԱՆ, 13 հոկտեմբերի./Նովոստի–Արմենիա/. Երևանի «Բանանց» ֆուտբոլային ակումբը կգլխավորի իսպանացի մասնագետ Տիտո Ռամալիոն, երկուշաբթի ասուլիսի ժամանակ այս մասին տեղեկացրեց ակումբի գլխավոր տնօրեն Ռոման Ասխաբաձեն։

«Թիմում լուրջ փոփոխությունների կարիք կա, և այդ փոփոխություններից մեկը գլոբալ իմաստով Տիտո Ռամալիոյի և նրա պրոֆեսիոնալ թիմի գալուստն է։ Փոփոխությունները կվերաբերեն ոչ միայն առաջին թիմին, այլ նաև ակումբի երիտասարդական թիմին», – նշեց Ասխաբաձեն։

Նրա խոսքով` ակումբի սեփականատերերը հավանություն են տվել Ռամալիոյի թեկնածությանը` հաշվի առնելով նրա փորձը։ Իսպանացին կսովորեցնի և կպատրաստի ակումբի մարզչական կազմին։

Ռամալիոն իր հերթին նշեց, որ իր հետ միասին Հայաստան են եկել բարձրակարգ պրոֆեսիոնալներ, որոնք աշխատանքի փորձ ունեն Իսպանիայի առաջատար ակումբների հետ։
45–ամյա Ռամալիոն 1993 թ.–ից աշխատել է «Դեպորտիվո Լա Կորունիա» ակումբում։ 2001–2012 թթ.–ին եղել է «Դեպորտիվո B» ակումբի («Դեպորտիվո լա Կորունիա» ակումբի պահուստային ակումբ) գլխավոր մարզիչը։ 2008–2010 թթ.–ին նա համատեղել է «Դեպորտիվո» ակումբի պատանեկան կազմի պատասխանատուի և ակումբի մարզական բազայի ղեկավարի աշխատանքները։

«Բանանց» ակումբը Հայաստանի 2013/2014 թթ.–ի չեմպիոնն է, ազգային առաջնության քառակի արծաթե մրցանակակիրը և Հայաստանի կրկնակի գավաթակիրը։–0–