«Միկա» ֆուտբոլային ակումբն իր անվանումը փոխելու մտադրություն չունի. մամուլի քարտուղար

ԵՐԵՎԱՆ, 28 հուլիսի. /Նովոստի–Արմենիա/. «Միկա» ֆուտբոլային ակումբն իր անվանումը փոխելու մտադրություն չունի, «Նովոստի–Արմենիա» գործակալությանը հայտնեց ակումբի մամուլի քարտուղար Աշոտ Մարտիրոսյանը։

Ավելի վաղ «Վկոնտակտե» սոցիալական ցանցում, «Կվազար» ֆուտբոլային ակումբի էջում տեղեկությունն էր հրապարակվել այն մասին, որ «Միկան» միանում է ռուսական «Կվազար» ֆուտբոլային ակումբին և շարունակելու է Հայաստանի Բարձրագույն լիգայում հանդես գալ «Միկա–Կվազար» անվան ներքո։

«Անվան փոփոխություն չի լինի։ Ակումբը կհամագործակցի ռուսական «Կվազար» ակումբի հետ, արդեն մեզ մոտ են եկել մի քանի ռուս ֆուտբոլիստներ` որպես լեգիոներներ»,– ասաց Մարտիրոսյանը։

«Կվազար» ֆուտբոլային ակումբը ստեղծվել է 2009 թվականին որպես սիրողական ակումբ։ 2012 թվականի վերջին, 2013 թվականի սկզբին պրոֆեսիոնալ ակումբների հետ ունեցած մի քանի ընկերական հանդիպումներից հետո որոշում կայացվեց այն մասին, որ թիմը Ռուսական առաջնությանը կհայտավորվի երրորդ դիվիզիոնի թիմերի շարքում։-0-