Բռնցքամարտի աշխարհի չեմպիոն Արթուր Աբրահամի հաջորդ մենամարտը բրիտանացի Սմիթի հետ է

ԵՐԵՎԱՆ, 08 դեկտեմբերի. /Նովոստի-Արմենիա/. Երկրորդ միջին քաշային կարգում WBO վարկածով աշխարհի չեմպիոն Արթուր Աբրահամը նախատեսում է ուժերը չափել  բրիտանացի Պոլ Սմիթի հետ, այս մասին «Նովոստի–Արմենիային» ասաց Արթուր Աբրահամի մամուլի քարտուղար Սիրան Գրիգորյանը:

Մենամարտը կկայանա Բեռլինի "O2 World" մարզապալատում, 2015 թվականի փետրվարի 21-ին:

Երկուշաբթի կայացել  է երկու բռնցքամարտիկների, նրանց մարզիչների և մենեջերների մամլո ասուլիսը: Արթուր Աբրահամը հայտարարել է, որ պատրաստվում է կրկին հաղթել Փոլ Սմիթին: Վերջինը նույնպես ընդգծել է հաղթելու իր ցանկության մասին:

Արթուր Աբրահամը (Ավետիք Աբրահամյան) ծնվել է Հայաստանում, հանդես է գալիս Գերմանիայի դրոշի ներքո: Նա դարձել է երկրորդ միջին քաշային կարգում WBO վարկածով աշխարհի չեմպիոն՝ 2012թ.-ի օգոստոսին չեմպիոնական տիտղոսը նվաճելով Ռոբերտ Շտիգլիցից: 2013թ.-ի մարտի 23-ին Աբրահամը չկարողացավ պաշտպանել աշխարհի չեմպիոնի տիտղոսը Շտիգլիցի հետ մենամարտում: Երկրորդ ռաունդում նա վնասվածք ստացավ: Ձախ աչքն այտուցվել էր, իսկ երրորդ ռաունդից հետո այն ամբողջությամբ փակվեց: Բժիշկի հետազոտումից հետո մրցավարները որոշեցին դադարեցնել մենամարտը՝ տեխնիկական նոկաուտով հաղթանակ շնորհելով Շտիգլիցին: Սակայն 2014թ.-ի մարտին Աբրահամը վերադարձրեց տիտղոսը՝ ռևանշ-մենամարտում պարտության մատնելով Շտիգլիցին, իսկ հետո նա չեմպիոնական տիտղոսը պաշտպանեց մայիսին Մոնտենեգրոն ներկայացնող բռնցքամարտիկ Նիկոլայ Սիյեկլոչի հետ մենամարտում:

Աբրահամը 2005-2009թթ.-ին եղել է միջին քաշային կարգում IBF վարկածով աշխարհի չեմպիոնը: «Boxsport» ամսագիրը Աբրահամին ճանաչել է Գերմանիայի 2012թ.-ի լավագույն բռնցքամարտիկը: Նա հինգ անգամ (2006, 2007, 2008, 2009, 2012 թթ.) Գերմանիայի լավագույն բռնցքամարտիկ է ճանաչվել:-0-