ԵՐԵՎԱՆ, 21 մայիսի. /Նովոստի–Արմենիա/. Հայաստանի ֆուտբոլի հավաքականը չորեքշաբթի Երևանում առաջին մարզումն է անցկացնում նոր գլխավոր մարզիչ, շվեյցարացի Բեռնար Շալանդի գլխավորությամբ, հայտնում է «Նովոստի–Արմենիա» գործակալության թղթակիցը։
Ուսումնամարզական հավաքի շրջանակում անցկացվող մարզմանը մասնակցում են հայկական ազգային թիմի բոլոր աստղերն ու առաջատար խաղացողները, մասնավորապես, «Սպարտակի» հարձակվող Յուրա Մովսիսյանը և Դորտմունդի «Բորուսիայի» կիսապաշտպան Հենրիխ Մխիթարյանը, ինչպես նաև չեխական «Պրիբրամի»` վնասվածքից հետո վերականգնված Լևոն Հայրապետյանը։
Ֆուտբոլի ակադեմիայի դաշտ է դուրս եկել 23 խաղացող, որոնց թվում են նաև նորեկներ, մասնավորապես, Դոնեցկի «Շախտյորի» երիտասարդ հարձակվող Արթուր Միհրանյանը։
Մարզման ընթացքում մշակվում են շվեյցարացի մասնագետի կողմից կիրառվող նոր վարժություններ, շեշտը դրվում է թիմային խաղի վրա։
Մարզմանը հետևում է Հայաստանի ֆուտբոլի ֆեդերացիայի նախագահ Ռուբեն Հայրապետյանը։
Շալանդի նշանակման մասին տեղեկությունը հրապարակվել էր փետրվարի 28–ին, իսկ ՀՖՖ գործադիր կոմիտեն նրա թեկնածությունը հաստատել է մարտի 10–ին։
Շալանդի հետ պայմանագիրը ստորագրվել է մինչև Եվրոպա-2016 առաջնության ընտրական շարքի ավարտը։
Մայիսի 27-ին հայ ֆուտբոլիստները Ժնևում ընկերական հանդիպում կունենան ԱՄԷ-ի հավաքականի հետ, մայիսի 31-ին՝ Շվեյցարիայի Սիոնում Ալժիրի հավաքականի հետ և հունիսի 6-ին՝ Գերմանիայի Մայնցում` Գերմանիայի հավաքականի հետ:
Հայ ֆուտբոլիստները պատրաստվում են Եվրո-2016 ընտրական փուլին։ Հայաստանի հավաքականն I խմբում է, որտեղ կխաղա Պորտուգալիայի, Դանիայի, Սերբիայի և Ալբանիայի թիմերի հետ։ -0
