Շախմատային աշխարհը սպասում է Արոնյանի և Կառլսենի միջև կայանալիք մենամարտին

ԵՐԵՎԱՆ, 12 մարտի. /Նովոստի–Արմենիա/. Աշխարհի գործող չեմպիոն Մագնուս Կառլսենի և գրոսմայստեր Լևոն Արոնյանի (թեկնածուների մրցաշարում նրա հաղթանակի դեպքում) միջև շախմատային թագի համար մենամարտը սպասված իրադարձություն է շախմատային աշխարհի համար, կարծում է Հայաստանի շախմատի ֆեդերացիայի փոխնախագահ, գրոսմայստեր Սմբատ Լպուտյանը։

Թեկնածուների մրցաշարը տեղի կունենա մարտի 13–30–ը Խանտի Մանսիյսկում։ Մրցաշարին կմասնակցի ութ գրոսմայստեր` Լևոն Արոնյանը (Հայաստան), Վիշվանաթան Անանդը (Հնդկաստան), Վլադիմիր Կրամնիկը (ՌԴ), Դմիտրի Անդրեյկինը (ՌԴ), Վեսելին Տոպալովը (Բուլղարիա), Շահրիար Մամեդյարովը (Ադրբեջան), Սերգեյ Կարյակինը (ՌԴ), Պետր Սվիդլերը (ՌԴ)։ Արոնյանը երրորդ անգամ է մասնակցում մրցաշարին։ 

«Հուսով եմ, որ Արոնյանը կկարողանան զբաղեցնել առաջին տեղը թեկնածուների մրցաշարում և նվաճել Կառլսենի հետ չեմպիոնի տիտղոսի համար պայքարելու իրավունքը, քանի որ շախմատային աշխարհի համար ամենահետաքրքիրը կլինի հենց Արոնյան–Կառլսեն հանդիպումը։ Շախմատասերները սպասում են այդ հանդիպմանը», – ասաց Լպուտյանը «Նովոստի–Արմենիա» գործակալությանը։

Նա բարձր գնահատեց հայ գրոսմայստերի` մրցաշարում հաղթելու հնարավորությունները։

 «Արոնյանը գլխավոր թեկնածուներից մեկն է։ Եթե նա կարողանա հանդես գալ այնպես, ինչպես արել է վերջին մրցաշարերում, ապա կարծում եմ, որ նա բոլորից շատ շանսեր ունի հաղթելու համար», – ասել է Լպուտյանը։

Նրա խոսքերով` մեծ դեր է խաղում հոգեբանական գործոնը։ «Երբ քեզանից շատ բան են սպասում, դա հանգեցնում է ներքին լարվածության։ Հուսով եմ, որ Արոնյանը կկարողանա հասնել ներքին հոգեբանական կայունության», – նշել է Լպուտյանը։

Արոնյանը երրորդ անգամ է մասնակցում մրցաշարին։  Առաջին տուրում հայ շախմատիստն ուժերը կչափի աշխարհի նախկին չեմպիոն Վիշվանաթան Անանդի հետ։–0–