Հայաստանի հավաքականի նոր գլխավոր մարզիչ Շալանդից կարելի է շատ բան սովորել. Մխիթարյան

ԵՐԵՎԱՆ, 5 մարտի. /Նովոստի–Արմենիա/. Դորտմունդի «Բորուսիա» ակումբի և Հայաստանի ֆուտբոլի հավաքականի կիսապաշտպան Հենրիխ Մխիթարյանը կարծում է, որ Հայաստանի հավաքականի նոր գլխավոր մարզիչ Բեռնար Շալանդից կարելի է շատ բան սովորել։

«Մենք երկուշաբթի 15 րոպե շփվեցինք։ Շալանդից շատ բան կարելի է սովորել, զուր չէ, որ նրան են նշանակել։ Իհարկե, ավելի վաղ նրա մասին չեմ լսել։ Սակայն նշանակումից հետո շատ բան եմ կարդացել նրա մասին։ Կաշխատենք», – ասել է Մխիթարյանը Ռուսաստան–Հայաստան ընկերական հանդիպման նախօրեին «Спорт-Экспресс»–ին տված հարցազրույցում։

Մխիթարյանը նաև նշել է, որ Հայաստանի հավաքականի գլխավոր նպատակն է հաղթել ամեն հանդիպման ժամանակ։

«Եվ հետո, արդեն ժամանակն է, որ մենք խաղանք Եվրոպայի առաջնությունում։ Սակայն այդ խնդիրը 2016 թ.–ին լուծելու համար մենք պետք է ոչ թե երազենք, այլ աշխատենք», – ավելացրել է Մխիթարյանը։

Ռուսաստան–Հայաստան ընկերական հանդիպումը տեղի կունենա մարտի 5–ին ժամը 18։00–ին Կրասնոդարի «Կուբան» մարզադաշտում։

Օրերս Հայաստանի հավաքականը գլխավորել է շվեյցարացի մասնագետ Բեռնար Շալանդը, սակայն ռուսների հետ ընկերական խաղում թիմը կղեկավարի Մինասյանը, ով ավելի վաղ արդեն գլխավորել է թիմը։–0–