ՖԻՖԱ–ի տրամադրած ֆինանսական աջակցությունը կազմել է միլիարդ դոլար

ԵՐԵՎԱՆ, 15 հունվարի. /Նովոստի–Արմենիա/. Ֆուտբոլի միջազգային ֆեդերացիայի  (ՖԻՖԱ) ծրագրերի զարգացման նպատակով ազգային ասոցիացիաներին ուղղված ՖԻՖԱ–ի ֆինանսական աջակցությունը հասել է մեկ միլիարդ դոլարի` 1999 թ.–ին կազմակերպության նախագահ Յոզեֆ Բլատերի կողմից այն գործարկելու պահից ի վեր, գրում է «ՌԻԱ Նովոստին»` հղում անելով կազմակերպության պաշտոնական կայքին։

Մեկ միլիարդ դոլար խորհրդանշական գումարը գրանցվել է Բոտսվանայի ֆուտբոլի ասոցիացիայի հաշվին փոխանցում կատարելուց հետո։ Վերջին 15 տարվա ընթացքում ասոցիացիայի 209 անդամներն ու 6 համադաշնություններն ընդհանուր առմամբ ստացել են, համապատասխանաբար, 778 մլն դոլար և 331 մլն դոլար։ Այդ միջոցները հիմնականում օգտագործվել են ենթակառուցվածքային նախագծերի իրականացման, նախագծման և կառավարման, տեխնիկական զարգացման, տղամարդկանց և կանանց ներքին մրցումների կազմակերպման համար, ինչպես նաև մանկապատանեկան ֆուտբոլի զարգացման նպատակով։ Ֆինանսական աջակցության ծրագրի (FAP) շրջանակներում կատարվող ամենամյա դրամական վճարումներն այս պահին կազմում են 250 հազար դոլար (որոնք տրամադրվում են ասոցիացիաներին) և 5,5 մլն դոլար (որոնք տրամադրվում են համադաշնություններին)։

1999 թ.–ից ՖԻՖԱ–ն տարբեր նախագծերի վրա ծախսել է ավելի քան 2 մլրդ դոլար։–0–