Արթուր Աբրահամը Sauerland Event-ի հետ կնքած պայմանագիրը երկարացրել է մինչև 2014թ.-ը

Միջին քաշային կարգում աշխարհի նախկին չեմպիոն, աշխարհահռչակ հայազգի բռնցքամարտիկ Արթուր Աբրահամը Sauerland Event բեռլինյան փրոմոութերական ընկերության հետ կնքած պայմանագիրը երկարացրել է մինչև 2014թ.-ը, հաղորդում է Ռուսաստանի հայերի «Երկրամաս» թերթը՝ հղում անելով bild.de-ին:

«Բեռլինում ինձ դուր է գալիս, ես շատ լավ հարաբերություններ ունեմ մենեջեր Վիլֆրիդ Զաուեռլանդի հետ, ես պարտական եմ նրան: Կարծում եմ, որ սա իմ վերջին պայմանագիրն է որպես պրոֆեսիոնալ բռնցքամարտիկ: Այս պայմանագրի ժամկետի ավարտից հետո ես կմնամ սպորտում և կաշխատեմ մարզական մենեջմենթի ոլորտում», - մեջբերում է բռնցքամարտիկի խոսքերը գերմանական թերթը:

Երկրորդ միջին քաշային կարգի բռնցքամարտիկների Super Six մրցաշարում տարած 3 պարտությունից հետո Աբրահամը նախատեսում է հունվարի 14-ին մենամարտ անցկացնել Օֆենբուրգում (Գերմանիա):
Նա երկրորդ միջին քաշային կարգում (76,2 կգ) ուժերը կչափի արգենտինացի բռնցքամարտիկ Պաբլո Ֆարիասի հետ, ինչից հետո Աբրահամը ծրագրում է վերադառնալ միջին քաշային կարգ և պայքարել չեմպիոնական տիտղոսի համար:

«2012թ.-ի վերջին ես կրկին չեմպիոն կդառնամ, տիտղոսային մենամարտն անպայման պետք է տեղի ունենա Բեռլինի O2 World Arena-ում: Սա ապագայի իմ նպատակներն են», - ասել է բռնցքամարտիկը:
Արթուր Աբրահամը (Ավետիք Աբրահամյան) ծնվել է Հայաստանում, հանդես է գալիս Գերմանիայի դրոշի ներքո: Նա 2005-2009թթ.-ին միջին քաշային կարգում IBF վարկածով աշխարհի չեմպիոնն էր: Աբրահամի մարզիչն է Ուլի Վեգները:-0-