Թուրքիայի վարչապետ Ռեջեփ Թայիփ Էրդողանն առաջարկել է իր երկրի բյուջեից պատկառելի նյութական պարգևատրում հատկացնել Մակեդոնիայի ֆուտբոլի հավաքականին՝ հոկտեմբերի 7-ին կայանալիք խաղում Հայաստանի հավաքականին հաղթելու դեպքում, հաղորդում է sovetunion.ru կայքը՝ հղում անելով Մակեդոնիայի խորհրդարանի սեփական աղբյուրներին:
Տեղեկատվության համաձայն, Էրդողանն իր առաջարկությունն արել է Մակեդոնիայի Խորհրդի (խորհրդարանի) նախագահ Տրայկո Վելյանոսկու հետ մասնավոր հանդիպման ընթացքում: Ինչպես ենթադրում են փորձագետները, Հայաստանի հավաքականի պարտության հարցում Էրդողանի շահագրգռվածությունը Թուրքիայի իշխող շրջանակների ցանկություններից է բխում, որոնք ցանկանում են խուսափել պատասխան խաղերում Հայաստանի արագ առաջընթացող հավաքականի հետ Թուրքիայի հավաքականի հանդիպումից՝ 2012թ.-ի Եվրոպայի առաջնության եզրափակչում խաղալու իրավունքի համար:
Պատմության մեջ առաջին անգամ Հայաստանն իրական հնարավորություն ունի դուրս գալ խմբից, դրա համար պետք է միայն հաջող խաղալ Մակեդոնիայի և Իռլանդիայի հետ (հոկտեմբերի 7-ին և 11-ին): Սակայն Մխիթարյանը նախընտրում է չշտապել ենթադրություններ անելով: «Պետք չէ այժմ մտածել Եվրո ընկնելու մասին»,- զգուշացնում է նա:
Ֆուտբոլի Հայաստանի հավաքականը երրորդ տեղն է զբաղեցնում Եվրո-2012 «В» ընտրական խմբում՝ 4:0 հաշվով սլովակների հանդեպ տարած սենսացիոն հաղթանակից հետո՝ պահպանելով մրցաշարի եզրափակիչ դուրս գալու իրական հնարավորությունները
Հայ ֆուտբոլիստները 14 միավոր են հավաքել և մեկ միավորով զիջում են երկրորդ տեղը զբաղեցրած իռլանդացիներին։ 17 միավորով խմբի միանձնյա առաջատարը ռուսներն են:
Սլովակները նույնպես 14 միավոր ունեն, բայց նրանք զիջում են հայ ֆուտբոլիստներին անմիջական հանդիպումների արդյունքներով:
Մակեդոնացիներն Անդորրայի նկատմամբ նվազագույն 1:0 հաշվով տարած այսօրվա հաղթանակից հետո 7 միավոր են հավաքել և զբաղեցնում են հինգերորդ տեղը։ Անդորրացիները, տանուլ տալով իրենց բոլոր հանդիպումները, փակում են մրցաշարային աղյուսակը։ Բոլոր թիմերն ութական հանդիպում են ունեցել։ Միաժամանակ հայ ֆուտբոլիստները խփած և բաց թողած գնդակների լավագույն տարբերությունն ունեն՝ -17-7: -0-
