«Լոկոմոտիվի» և Ռուսաստանի երիտասարդական հավաքականի կիսապաշտպան Ալան Գատագովը հայտարարել է, որ Ռուսաստանի գլխավոր հավաքականը պետք է պարտության մատնի Հայաստանի հավաքականին Եվրո-2012-ի ընտրական փուլի հանդիպման ժամանակ, ինչպես նաև պատմել է երիտասարդական հավաքականում տիրող իրավիճակի մասին:
Ռուսաստանի հավաքականը շաբաթ օրը Սանկտ Պետերբուրգում ուժերը կչափի Հայաստանի հավաքականի հետ Եվրո-2012-ի ընտրական փուլի շրջանակներում: Ռուսաստանի երիտասարդական հավաքականը՝ Նիկոլայ Պիսարյովի գլխավորությամբ, հունիսի 4-ին կմեկնի իսպանական Սորիա, որտեղ ուժերը կչափի Իսպանիայի երիտասարդական հավաքականի հետ:
«Կարծում եմ, որ Ռուսաստանի հավաքականը երկու գնդակի տարբերությամբ պարտության կմատնի Հայաստանի հավաքականին: Կարող է լինել 2:0 կամ 3:1: Ամեն դեպքում այն սեփական հարկի տակ անցկացվող հանդիպում է, և ժամանակն է դուրս գալ բացասական մթնոլորտից: Ուզում եմ, որ ուրախության առիթներն ավելի շատ լինեն: Մենք կարողանում ենք տոնել, երկրպագել, ինչը բազմաթիվ անգամ ապացուցել ենք: Հիշենք միայն, թե ինչ էր կատարվում հոլանդացիների հետ տեղի ունեցած հանդիպումից հետո: Այժմ ևս ավելի շատ աջակցություն ենք ակնկալում: Մենք բոլորս մարդ ենք, և ամեն բան կարող է պատահել: Այդ մասին պետք է հիշել և վերաբերվել մեծ ընկալմամբ: Հաճախ ակումբից գալիս ես ուժասպառ վիճակում, սակայն, ամեն դեպքում, պետք է անել հնարավոր ամեն ինչ», - ասել է Գատագովը «Р-Спорт» գործակալության թղթակցին տված հարցազրույցում, հաղորդում է ՌԻԱ Նովոստին:
Գատագովի խոսքով՝ Նիկոլայ Պիսարյովի գլխավորած երիտասարդական հավաքականում շատ լավ իրավիճակ է:
«Պիսարյովի հետ շատ լավ է աշխատել: Ուզում ես գալ հավաքական: Այստեղ շատ լավ իրավիճակ է: Պիսարյովի մոտ առաջին պլանում կարգապահությունն է: Դա վերաբերվում է խաղի կարգապահությանն ու կենցաղային կարգապահությանը: Ֆուտբոլում մանրուքները չեն լինում, և ես համաձայն եմ դրա հետ: Բացի այդ մենք հիմա մարզվում ենք լավ դաշտում, ապրում ենք լավ հյուրանոցում: Այնպես որ աշխատանքի համար հոյակապ պայմաններ են ստեղծված», - նշել է նա:-0-
