Օլիմպիական խաղերը միավորում են ուժեղ և համարձակ մարդկանց. ՀՀ նախագահ

ԵՐԵՎԱՆ, 4 օգոստոսի. /Նովոստի-Արմենիա/. Օլիմպիական խաղերը միավորում են ուժեղ և համարձակ մարդկանց, ասել է ՀՀ նախագահ Սերժ Սարգսյանը 31-րդ օլիմպիական խաղերին մասնակցելու նպատակով Բրազիլիա մեկնած Հայաստանի պատվիրակության անդամներին հղած ուղերձում, հաղորդում է նախագահի մամուլի ծառայությունը:

Հայաստանցի օլիմպիականներին ուղղված ուղերձում նա նշել է, որ մարզիկներին հիանալի հնարավորություն է տրված պաշտպանելու երկրի մարզական պատիվը Ռիո դե Ժանեյրոյում օգոստոսի 5-ին մեկնարկելիք 31-րդ օլիմպիական խաղերում:

«Մեծ սպորտը պահանջում է աշխատանք, կարգապահություն և հավատ սեփական ունակությունների հանդեպ: Օլիմպիական խաղերը միավորում են ուժեղ և համարձակ մարդկանց: Այդ հատկանիշներով դուք արդեն նվաճել եք համաշխարհային գլխավոր մարզահանդեսում մեր երկիրը ներկայացնելու իրավունքը: Դա արդեն մեծ պատիվ է: Մնում է, որ հաջողության հասնեք օլիմպիական մրցասպարեզներում և Հայաստանն ըստ արժանվույն ներկայացնեք համայն հայությանն ու աշխարհի մարզասերներին», - մեջբերում է Սերժ Սարգսյանի խոսքը նախագահի մամուլի ծառայությունը:

Նա նաև նշել է, որ հավատում է Հայաստանի 33 մարզիկներով համալրված պատվիրակությանը, որը թվով ամենամեծն է երկրի անկախացումից ի վեր:

«Դուք կարող եք և պարտավոր եք զարգացնել արդեն ձեռք բերածը և տեղ զբաղեցնել օլիմպիական պատվանդանին: Դուք բազմիցս հաստատել եք ձեր բարձր կարգը, ունեք համապատասխան վարպետություն, ընդհանուր լավ պատրաստվածություն, անհրաժեշտ փորձ և կամային բարձր որակներ», - նշվում է հաղորդագրության մեջ:

Նախագահը հույս է հայտնել, որ մարզիկները բրազիլական ստուգատեսում կարդարացնեն սպասելիքները և նրանց հաղթանակների շնորհիվ կբարձրացվի հայոց եռագույնը:

«Մաղթում եմ հաջողություն և հաղթական վերադարձ հայրենիք», - ասել է ՀՀ նախագահը: -0-